Abantu abahlala eZhombe eNkabazwe sebevuselela idamu eselagqhitshelwa litshebetshebe ukwenzela ukuthuthukisa isigaba sabo.
Izakhamizi ezihlala esigabeni senduna uTshukela Ntabeni zithi kuqakathekile ukuvuselela idamu leMazhe, elakhiwa kudala, ngoba inkomo zabo kaziselandawo yokunatha amanzi njalo bafisa ukwenza inhlelo ezitshiyeneyo.
Omunye wabo, uMnu. Thulani Zhombe, uthi kuyajabulisa ukubona abantu bebambisana ukwenzela ukuzithuthukisa.
“Ngibonga kuqala umqondo wokuthi kuqalwe iproject yokuthukisa isigaba, yinto enkulu leyi njalo yinto ezenza isigaba siqine ekuvuseleleni lindawo. Ngifuna ukuthi ngithi asiqhubekeni ngokuvuselela leli damu.”
Izakhamizi zithi zingancedakala zingavuselela idamu. (Photo: Mlondolozi Ndlovu)
Esinye isakhamuzi endaweni le, uMnu. Badala Dlamini, uthi uhlangothi lukahulumende olweDistrict Development Committee soluhlolisise indlela yokuvuselela idamu leli.
“IDDF report sesiyibonile ngithanda ukubonga kakhulu. Bengithanda ukuba ngichasise ukuba kume kankanjani. Ngake ngakutsho ngaphambilini ukuthi iDDF kayigebhi madamu.”
UMnu. Livingstone Stimela, isakhamuzi sakulumango, uthi badinga imali yokuhlawula okuzakwenziwa yinkampani yeGordad, elakho ukubancedisa ekulungiseni idamu leli.
“Omunye wethu uke wakhuluma ngoGordad. Kodwa engakayenzi umsebenzi uzafuna ireport yeDDF ngoba leli lidamu lika hulumende hatshi elabantu. Kakumelanga sisole umbiko ovela kuDDF. Sizafuna makini ukubhadala.”
Abantu bonke esigabeni lesi, abagoqela uMnu. Mlindeli Mgxamantoni, bathi lizanceda uzulu lingalungiswa idamu leMazhe.
“Mina inhlanhla yami yikuthi amadamu onke ngawami ngoba amadamu ayangisebenzela. Ele Ngingeni ngelami eleNgingeni ngelami. Lokhu okwenzakalayo yinto ebalulekileyo kakhulu.”
Izakhamizi zithi zisebenza lenduna uTshukela Ntabeni losubhuku uMnu. Kenesi Siwela abathakazelela ukuvuselelwa kwedamu leli. Kasenelisanga ukukhuluma leziphathamandla zikahulumende ngodaba lolu.
Your browser doesn’t support HTML5
Udaba Esilethulwe NguMlondolozi Ndlovu