Inhlanganiso yababalisi eyeProgressive Teachers’ Union of Zimbabwe ithi bonke ababalisi kumele bahambe emsebenzini kusasa loba uhulumende esithi uzaxotsha bonke abangahlatshwanga ijekiseni yokuzivikela kumkhuhlane weCOVID-19.
UMnu. Takavafira Zhou, umkhokheli wePTUZ, uthi akukho emthethweni ukuba kuxotshwe abangahlatshwanga njalo bengabikelwanga ngemfanelo nguhulumende. Uhulumende wathi izisebenzi zonke kwakumele zihlatshwe kungakedluli mhlaka 15 ngoMfumfu.
UMnu. Paul Mavima, umphathintambo wohlangothi lukahulumende olubona ngezisebenzi, utshele iphephandaba leHerald ukuthi bazaxotshwa bonke abangahlatshwanga ijekiseni yokuzivikela kumkhuhlane weCOVID-19.
UMnu. Lovejoy Sibanda, okuhlangothi lwabatsha kunhlanganiso yePTUZ, uthi ababalisi bonke kumele bahambe emsebenzini kusasa.
USikhwicamfundo Sifiso Ndlovu, umqondisi wenhlanganiso yeZIMTA, uthi akwziwa ukuba uhulumende uyabazi abahlatshiweyo labangakahlatshwa ijekiseni efunakalayo.
UNdlovu uthi abakathathi isinqumo sokuthi bazakwenzana ngodaba lolu.
UMnu. Nqobani Sithole, igcwetha elilwela ilungelo loluntu, uthi uhulumende akumelanga abambe ngamandla izisebenzi ukuba ziyehlatshwa ijekiseni le.
USithole uthi akuqedakali okwenziwa nguhulumende khonamanje.
Uhulumende uthi ukuhlatshwa kwababalisi lezinye izisebenzi kungehlisa inani lababanjwa yiCOVID-19 ezikolo.
Kusenjalo, uhlangothi lwezempilakahle lubika ukuba kulabantu ababili ababulewe ngumkhuhlane weCOVID-19 izolo eZimbabwe kwathi abafika phose amatshumi amathathu bahlolwe batholakala belegciwane leCoronavirus.
Lubika njalo ukuthi asebehlatshwe ijekiseni yakuqala bedlula izigidi ezintathu – 3,2 million kuthi asebehlatshwe okwesibili bafika phose izigidi ezimbili lengxenye – 2,4 million. Kulabantu abedlula inkulungwane ezine lengxenye – 4,657 asebebulewe ngumkhuhlane weCOVID-19 elizweni kusukela ngoMbimbitho nyakenye.
Your browser doesn’t support HTML5
Ababalisi Bakhuthazwa Ukuba Bahambe Ezikolo Loba Bengahlatshwanga Ijekiseni Yokuzivikela KuCOVID-19