Kulabantu eZimbabwe abathi kuyabahlupha kakhulu ukuba ilizwe liqhubekele phambili lisiba lenhlelo zokuvala ngci ezinye indawo kusenzelwa ukuvimba ukumemetheka kwegciwane leCOVID-19. Umsekeli kamongameli, uMnu. Constantino Chiwenga, usanda kwengeza ngamaviki amabili uhlelo lweCOVID-19 lockdown esithi umemetheka ngamandla umkhuhlane lo elizweni.
Esethula umbiko wokwengeza ezinye insuku zeCOVID-19 lockdown, uChiwenga wathi izikolo kumele zilungiselele abantwana lababalisi kungakaqali izifundo. Wathi wesaba ukuba uzamemetheka ngamandla umkhuhlane lo, obulele abantu abahlanu izolo kwathi abafika phose amakhulu amathathu – 297 bahlolwe batholakala bele COVID-19. Loba kunjalo, uMnu. Gilbert Mpofu, ohlala eHarare, uthi kasiboni isizatho senhlelo zeLockdown.
“Loba nje kube leyinye iVariant yeCorona abathi imemetheka kakhulu ukudlula amanye amaViriant angaba khona, i-Lockdown leyi ukwengezwa kwayo ngibona angani kuyaphazamisa abantwana besikolo, kuzayenza bengahambi futhi esikolo. Inyanga edluleyo le abafundanga, khona mina angiboni isizatho sokuthi kube kulokhe kusenziwa ama-Lockdown mina.Ngabe kuyavula nje, abantu baphile, siphile layo iCorona yakhona leyo ngoba ukuthi kube lama Lockdown kokuphela akusizi mani. ”
Lokhu kusekelwa nguMnu. Anon Khumalo, isakhamuzi sakoBulawayo.
“I-extension yama measures eLockdown leyi iyasihlukumeza kakhulu, ikakhulu ekufundeni kwabantwana, izikolo ziqhubeka zivaliwe, sokuzaba lethuba elide kakhulu, abantwana bengafundi. So kutsho ukuthi heyi, sokusihlupha kakhulu ngoba abantwana bazahlala isikhathi eside kakhulu abanye bayacina besenza ezinye izinto ezingasaqondanga ngenxa yokuthi sebehlale kakhulu bengayi esikolo.”
UMnu. Junior Moyo laye ukhala ngabantwana asebelahlekelwa yisikhathi sokufunda.
“Engikubonayo about the extension eye Lockdown, yikuthi especially in terms of school, abantwana abasatholi ama-chance okubana beye esikolweni. Yiyo into esiphazamisa abantwana kakhulu.”
UNkosikazi Siphesihle Mlilo uthi lanxa kulungile okwenziwa nguhulumende, uzwela abantwana besikolo.
“Mina i-extension ye COVID measures, ngiyibona i-right ngoba sizama ukuvikela umkhuhlane ukuthi ungamemetheki kodwa ngilozwelo njengomzali, abantwabethu laba abangasakwanisi ukuya esikolo. Ingabe kuthiwa siyakwanisa sonke abazali but akuvumi manje ngendaba ye-economy ukuthi abantwabethu befunde online njengamanye amazwe, ingabe kungcono.”
UNkosikazi Zanele Nkomo, ohlala koBulawayo, ulombono ofanayo.
“Sizwa ubuhlungu ngokungezelwa kwe Lockdown, i-lockdown isibandezela kakhulu phansi ngoba abantwana abasayi esikolweni. Bebevulile yebo ngoDecember kodwa kakusincedanga ngoba abantwana bafunda two weeks kuphela, ababhalayo, babhala, abanye kabaqedanga ukubhala. Kuthe kuqala u-January bebuyela ezikolweni ukuyaqediswa. ”
UNkosikazi Mable Simango, ophila ngokuthengisa impahla etshiyeneyo, uthi luyamphambanisa kakhulu uhlelo lweCOVID-19 lockdown.
“I-Lockdown leyi isiphilisa nzima thina ikakhulu thina amaZimbabwens. Ilizwe lethi livele kalimanga kuhle so ma sokusiba le Lockdown so, thina singabantu bokuzisebenzela, isikhathi esisebenza ngaso, lalapho esisebenzela khona kwesinye isikhathi vele asivunyelwa so lesikhathi okube kumele sisuke ngaso, siyabe sisebenza sinjalo, sigijinyiswa , siyaxotshwa lapho esisebenzela khona, akuvunyelwa.”
UNkosikazi Nesisa Siziba, ophila ngokuthengisa impahla azithenga kwamanye amazwe, uthi kalumiswe uhlelo lweCOVID-19 lockdown.
“Besikhangelele ukuthi zonke izinto zingabuyela zibe normal, lama border avule sikhone ukuyawoda ngoba lakhathesi ama-businesses a-down ngoba sikwanisi ukuhamba siyehoda ukuthi sithole imali yokubhadalela abantwana i-school fees.”
Kodwa uhulemende uthi konke akwenzayo kulenhloso yokulondoloza izizalwane kubhubhane lweCOVID-19. Ukhuthaza abantu ukuba behlatshwe ijekiseni yokuzivikela kumkhuhlane weCOVID-19. UMongameli Emmerson Mnangagwa utshele abalandeli bebandla leZanu PF emhlanganweni owePolitburo owenziwe ngoLwesihlanu ukuba manengi amajekiseni eZimbabwe awokuzivikela kugciwane leCOVID-19.
“Kasikho isizatho sokuba umuntu ahlale engahlatshwanga, minengi kakhulu imithi esilayo okokuthi sizofika isikhathi sokuthi sizoxotshanisana labantu edolobheni lapha, sibahlaba. ”
Uhlangothi lwezempilakahle luthi sebesedlula izigidi ezine – 4.2 million asebehlatshwe ijekiseni yakuqala eyokuzivikela kumkhuhlane weCOVID-19 eZimbabwe. Asebehlatshwe eyesibili bedlula izigidi ezintathu – 3.2 million.
Your browser doesn’t support HTML5
Udaba Esilethulelwe NguMavis Gama