Uhlangothi lwezempilakahle lubika ukuba abantu ababili babulewe ngumkhuhlane weCOVID-19 izolo eZimbabwe kwathi abafika phose amatshumi ayisikhombisa – 67 bahlolwe batholakala belegciwane leCoronavirus.
Lokhu kwenzakala ngesikhathi abantu abanengi besithi sebezama ukuphanda impilo ngendlela ezitshiyeneyo kulandela ukuyekethiswa kweziqondiso zeCOVID-19 lockdown nguhulumende.
Kulabantu abathi uhulumende kumele avule indawo zonke ukwenzela ukuthi besebenze kahle kulandela ukuyekethiswa kweziqondiso zeCOVID-19 lockdown. UMnu. Victor Dube uthi kumele ivulwe imingcele yonke ukuze abantu benelise ukuthenga njalo bethengise impahla etshiyeneyo.
“Amazwe amakhulu lawa anjengaboBritain, sebebonile ukuthi umkhuhlane lowu, sesiphila lawo, kayisiwo mkhuhlane owokuthi sizawumelela uphele, kawupheli lowu. Njalo basebebona ukuthi hayi, esesikubona khathesi sidinge amacebo, sizame lathi ukuthi umuntu engabanjwa ngumkhuhlane, singamelapha njani. Ngoba usungumkhuhlane onejengomvimbane, umvimbane kawelapheki. So, sokuyinto esiphila ngayo, ukuthi abantu behluleke ukuphila ngoba kulomkhuhlane, hayi, akuncedi lutho.”
UDube uthi abantu kabasazilandeli iziqondiso zokuzivikela kumkhuhlane weCOVID-19. Uthi sebephila njengalokhu ababekwenza ungakaqhamuki umkhuhlane weCOVID-19.
“Sokukhanya angathi uhulumende ungemuva kokwenzakalayo elizweni ngoba abantu bonke esingathi khonokho ukuthi abantu kumele beme ukuhamba ngezikhathi ezinje, benze lokhu lalokhu, hayi abantu bebengasakulandeli. Ukukhuluma besithi sesisenza lokhu, sekusiba ngcono kuba nje, hayi yikukhuluma nje but ebantwini bekungasekho lokho okwe-lockdown.”
Kodwa kulabanye abathi kuqakathekile ukuba abantu bezilandele iziqondiso zokuzivikela kumkhuhlane weCOVID-19. Omunye wabo nguMnu. Nqobizitha Khumalo.
“Umzimba unganikwa amagciwane awesifo, awesifo abesengena, kutsho ukuthi umzimba uyabe usulungiselele, amasotsha esekhona. Ngiyakhuthaza kakhulu uhulumende ngikhuthaze kakhulu i-Ministry yezempilakahle ukuthi ukuthi benze konke abakukwanisayo, abakwenelisayo ukuthi ulungiswe lapha eZimbabwe. Singabolahlekelwa yiForeign Currency phetsheya kolwandle thina silakho konke okokuthi sizilungisele thina.”
Uhulumende ukhuthaza uzulu ukuba azivikele kumkhuhlane lo ngokulandela iziqondiso ezethulwa yinhlanganiso yezempilakahle eyeWorld Health Organization - WHO. UDokotela John Mangwiro, umsekeli kamphathintambo wezempilakahle, uthi kumele abantu bezivikele ngoba umkhuhlane lo uguquka sonke isikhathi.
“Amagagasi wonke, aqala kwezinye indawo abesesabalala umhlaba wonke, sesikwazi ukwenza kwawo. Ma igagasi lingaqala kwenye indawo, lilakho ukusabalala umhlaba wonke yikho nje kuthiwa lubhubhane. Kungakho njengohulumende kumele sizivikele, sihlatshwe ijekiseni.”
Uhlangothi lwezempilakahle lubika ukuba sebesedlula inkulungwane ezingamakhulu amabili – 230, 402 asebathapha igciwane leCOVID-19 eZimbabwe. Umkhuhlane lo sowabulala abafika phose inkulungwane ezinhlanu lengxenye – 5,362. Asebajovwa ijekiseni yokuzivikela kumkhuhlane weCOVID-19 bedlula izigidi ezine – 4.3 million.
Your browser doesn’t support HTML5
Udaba Esilethulelwe NguMavis Gama