Uhlangothi lwezempilakahle lubika ukuthi kulabantu abalitshumi lanhlanu – 15 ababulewe ngumkhuhlane weCOVID-19 ngoMgqibelo kwathi abedlula amakhulu amathathu – 321 bahlolwe batholakala belomkhuhlane weCoronavirus eZimbabwe.
Luthi lokhu kutsho ukuthi sokulabantu abedlula inkulungwane – 1,193 asebebulewe yiCOVID-19 elizweni kusukela ngoMbimbitho nyakenye.
Abantu abendlula inkulungwane ezingamatshumi amathathu – 33,273 sebetholakale bele COVID-19 eZimbabwe. Kunani leli asebephephe kumkhuhlane lo bedlula inkulungwane ezingamatshumi amabili lanhlanu – 25,361.
Kuleziphathamandla zikahulumende ezimbalwa esezibulewe ngumkhuhlane lo. Kubikwa ukuba uhulumende useqoqe izigidi ezilikhulu zama dola eMelika – US$100 million eyokuthenga amajekiseni okuvikela uzulu kumkhuhlane weCOVID-19.
Iphephandaba leSunday Mail lithi uMnu. George Guvamatanga, umabhalane wohlangothi lukahulumende olubona ngezemali, uthi eleZimbabwe lizamanyana lamanye amazwe kuzwekazi leAfrica ekuthengeni amajekiseni eCoronavirus.
Okwamanje abantu abanengi bathi bathwele amagabha avuzayo ngesikhathi uhulumende elwisana lomkhuhlane weCOVID-19 phansi kohlelo lweCoronavirus lockdown.
Abanye abathwele nzima ngabathengisa impahla emigwaqweni. UMnu. Michael Ndiweni, umqondisi wenhlanganiso yeBulawayo Vendors and Traders Association uthi uhulumende kumele ancede bonke abantu abathengisa impahla emigwaqweni.
Your browser doesn’t support HTML5
ingxoxo Esiyenze loMichael Ndiweni
UMnu. Joseph Tshuma, okubandla leZanu PF, uthi kumele abantu badonse ndawonye ekunqabeleni ukumemetheka komkhuhlane weCOVID-19.
Your browser doesn’t support HTML5
Ingxoxo Esiyenze loMnu. Joseph Tshuma