Umemetheka ngamandla umkhuhlane weCOVID-19 eZimbabwe obulele abantu abalitshumi lambili izolo – 12.
Umkhuhlane lo usuguqule indlela abantu abaphila ngayo elizweni lemhlabeni wonke jikelele.
Uhlangothi lwezempilakahle lubika ukuba kulabantu abedlula amakhulu ayisithupha – 636 abahlolwe izolo batholakala belegciwane leCOVID-19. Luthi umkhuhlane lo sowabulala abantu abedlula inkulungwane ezinhlanu – 5,148 kusukela ngoMbimbitho nyakenye. Abantu abanengi bathi sebephila nzima ngenxa yeCOVID-19.
UNkosazana Pretty Mpofu, ophila ngokuthengisa impahla etshiyeneyo, uthi umthwalise nzima umkhuhlane lo.
“Kusukela ekubeni lendlala ezindlini, abantu bayalamba ezindlini. Ngoba sona selele ukuthi abantu abanengi ngabaphila ngokuzisebenza. Ngakho ngesikhathi lesi seCOVID abantu bayehluleka ukuhamba beyenze imisebenzi yabo belhululekile ngenxa yokwesaba ukumemetheka kwemikhuhlane. Njalo sesikhangele labantwana besikolo. Sekule too much teenage pregnancies, too much drug abuse abantwana betshona emigelweni bebhema izidakamezwa ngenxa yokuthi abayi esikolo.”
Lokhu kusekelwe nguMnu. Greater Sibanda, isakhamuzi seEmganwini koBulawayo.
"Abantu bakithi ngesikhathi seCOVID-19 bathwele nzima kakhulu. Okwakuqala, abantu kabala mali, abantu bakithi kabasebenzi, izinto ziyadula phandle lapha. Abantu bakithi kabalamali yokuthi bazise ezibhedlela abenelisi ukuthenga imithi nxa abantwana begula kumbe subanjwe yiCOVID-19. Ngesikhathi iCOVID-19 ingekho abantu kade bekwazi ukuthi bazenzele izinto, ngesikhathi lesi abenelisi ukuzenzela izinto.”
Uyakhala loNkosikazi Sharon Luphahla ngomkhuhlane weCOVID-19.
“Umkhuhlane weCOVID-19 lo ngibona uhlasele abantwana besikolo kakhulu.lminyaka isimbili bengahambi esikolo ngendlela eyiyo. Okunye izikolo zethu kanye lama University ehlulekile ukuthi abafundi bathole izifundo zabo online. Ngakho iCOVID-19 isincindezele ikusasa yabantwana."
UMnu. Senzo Hadebe, umongi osebenza koBulawayo, uthi inani labantu ababulawa ligcikwane litshengisa ukuthi umkhuhlane lo lokhe ukhona ngakho kuqakathekile ukuthi uzulu alandele izixwayiso ezivele kwezempilakahle.
"ICOVID-19 lokhe ikhona phakathi kwethu. Uhlupho lwayo yikuthi yisitha esingabonakaliyo, ngakho ulakho ukuthi uhlangane laso lapho ongacabangeli khona. Ubona umuntu ophila laye kodwa engela zibonakaliso ube susithi kala, yingozi leyo esihlangana layo okokuqala, okwesibili singakhangela amanani abantu abafayo bebulawa yi COVID 19 kutshengisela ukuthi lokhe ikhona ngoba kwelinye ilanga uyathola kukhuphukile kwelinye kuyehlile kitshengisela ukuthi COVID-19 lokhe ikhona njalo siseselayo okwesikhathi esilandelayo njalo kumele sihlale siqaphelisele kuze kufike leso sikhathi kungasela bantu abafayo Kumbe abagulayo.”
Uhulumende ukhuthaza abantu ukuba belandele izinqondiso ezethulwa ngabezempilakahle sonke isikhathi ukuze bezivikele ekuthapheni igciwane leCOVID-19. Uhlangothi lwezempilakahle luthi bedlula izigidi ezine – 4.2 million abantu asebehlatshwe ijekiseni yakuqala yokuzivikela kumkhuhlane weCOVID-19. Asebehlatshwe ijekiseni yesibili bedlula izigidi ezintathu – 3.2 million.
Your browser doesn’t support HTML5
Udaba Esilethulelwe NguBathabile Masuku