Uhulumende uthi sokulabantu abalitshumi lane abalomkhuhlane weCoronavirus COVID-19 kulandela ukutholakala komunye olegciwane leli koBulawayo ngoMgqibelo.
Abantu abathathu sebabulawa ngukhuhlane lo eZimbabwe.
Umbiko owethulwe luhlangothi olubona ngezempilakahle uthi iMpilo Central Hospital izaqala ukuhlola abantu abacatshangelwa ukuthi balomkhuhlane lo ngoMvulo.
Kulemitshina esanda kufakwa esibhedlela lesi eyokuhlola abantu ngesikhathi kulabantu ababili edolobheni leli asebetholakale belimkhuhlane lo.
Odokotela bathi lokhu yikho okufunakalayo nxa eleZimbabwe lifisa ukuvimba ukumemetheka komkhuhlane lo osogulise abantu abanengi emhlabeni wonke jikelele wabulala abanye.
Inhlanganiso yeGlobal Fund isanda kunika eleZimbabwe ezigidi ezinhlanu zamadola – $5 million yohlelo lolu.
EleZimbabwe okwamanje lilohlelo lokuvalela abantu ezindlini okumele lugqitshwe ngeviki ezayo kodwa kukhanya engani kungengezwa insuku zokuthi uzulu ahlale ezindlini lobanje abantu abanengi bekhala ngokuswela ukudla lokunye.
uDokotela Rudo Gumbo, obona ngezempilakahle eseHarare, uthi kuqakathekile ukuthi kuvinjwe ukumemetheka kwegciwane leCoronavirus ngendlela zonke.
Abasekela ibandla elibusayo bayaluncoma uhlelo lukahulumende lokuvimba ukuthi ungamemethiki umkhuhlane weCoronavirus. UMnu. Believe Gaule, osekela ibandla leli, uthi kuhle okwenziwa nguhulumende kaMongameli Emmerson Mnangagwa.
Kodwa ukhansila wakoBulawayo, uMnu. Mlandu Ncube, uthi abantu bathwele nzima ngenxa yokuthi kabasenelisi ukuziphilisa.
Kusenjalo, umphathintambo wogatsha lwezisebenzi, uSikhwicamfundo Paul Mavhima, uthi sebelungisa umthetho wokumisa amankampani afuna ukuxotsha izisebenzi ngenxa yohlelo lokuvimba ukumemetheka komkhuhlane weCOVID-19.
UMavhima uthi manengi amankampani afuna ukwenza lokhu.
Ingcwethi ebona ngokudlelana kwezisebenzi labaqhatshi, uMnu. Davies Ndumiso Sibanda, uthi kumele izisebenzi zikhulumisane labaqhatshi ngezemisebenzi ngesikhathi ilizwe lilwisana lomkhuhlane weCoronavirus.
Uthi abantu kabalaqiniso ngeholo labo njalo abazisebenzayo bathwele nzima.
Izisebenzi emhlabeni wonke jikelele zibhekane lodubo lolu njengoba amankampani evaliwe kusenzelwa ukuvimba ukumemetheka komkhuhlane weCoronavirus COVID-19.
Your browser doesn’t support HTML5
Uyamemetheka Umkhuhlane weCoronavirus eZimbabwe