Abantu abaphila ngokuthenga bethengisa impahla bathi sebesehluleka ukuziphilisa ngenxa yohlelo lokuvalelwa ezindlini ilizwe leZimbabwe lizama ukuvimba ukumemetheka komkhuhlane weCoronavirus COVID-19.
Abakhulume lomsakazo weStudio 7 bathi sebephila nzima ngoba kabasenelisi ukuthengisa impahla etshiyeneyo.
Bathi lokhu kwenziwa yikuthi uhulumende lokhu evimbile endaweni zokuthengisela impahla yabo esesaba ukuthi kungamemetheka igciwane leCOVID-19.
Uhulumende weZimbabwe usanda kuthatha isinqumo sokuthi kuvulwe amanye amankampani okwesikhatshana ngelanga ukuze abanye abantu benelise ukuziphilisa. Kodwa lokhu kuvalwe ngci emigwaqweni okuthengisa impahla etshiyeneyo.
UNkosikazi Zelder Ndlovu, okunhlanganiso yabantu abathenga bethengisa impahla eyeZimbabwe Chamber of Informal Economy Associations, uthi banengi kakhulu ababhekane lohlupho lokuswela ukudla lokunye ngenxa yokuvalelwa ezindlini.
UNkosikazi Ndlovu uthi kuzakuba nzima ukuthi bavuselele amabhizimusi abo lungagqitshwa uhlelo lokuvalelwa kwabantu ezindlini eZimbabwe. Uthi amalunga enhlanganiso le asesebenzisa imali okumele bathenge ngayo impahla yokuthengisela uzulu.
Okwethulwe nguNkosikazi Ndlovu kusekelwa nguMnu. Permanent Sibanda, okunhlanganiso le esigabeni seLupane esabelweni seMatabeleland North.
USibanda laye uthi bazakwehluleka ukuvuselela amabhizimusi abo lungagqitshwa uhlelo lokuvalela abantu ezindlini olweCoronavirus lockdown.
Umkhokheli wenhlanganiso le eGwanda, uNkosikazi Mary Maimbo, ukhuthaza uhulumende ukuba avuselele umnotho abantu bathole okokwenza.
Bakhona njalo abachothoza okwenziwa nguhulumende lamakhansili abhidliza izakhiwo ezokuthengisela impahla emigwaqweni okuthiwa kazikho emthethweni. Omunye wabasola lokhu nguMnu. Samuel Wadzai wenhlanganiso yeVendors Initiative for Social and Economic Transformation.
Kasenelisanga ukukhuluma ngodaba lolu lomphathintambo obona ngebesifazane, amabhizimusi amancane lokunye, uNkosikazi Sithembiso Nyoni. Ngesikhathi loludaba lulotshwa ubelokhe engakawuphenduli umlayezo esimthumele ebulenjini bokuxhumana.
Your browser doesn’t support HTML5
Udaba Esilethulwe nguMavis Gama