Abantu abanengi sebethenga ukudla okunengi bekugcina ezindlini kulandela imibiko ethi uhulumende ulakho ukuqinisa iziqondiso zohlelo lwe-Lockdown.
Okwethusa abantu yikukhuphuka kwenani labatholakala bele COVID-19 koBulawayo njalo lemibiko ethi uhulumende ulakho ukuvala ngci ilizwe lonke esenzela ukuvimba ukumemetheka komkhuhlane lo.
UNkosikazi Siphilile Ncube uthi bazabulawa yindlala uhulumende engaqinisi iziqondiso zohlelo lokuvalela uzulu ezindlini.
“Mina ngilovalo lokuthi nxa kuyikuthi ilanga lakusasa siyavalelwa mina angiziboni ngiyiqeda kuhle ilockdown ngoba bengilokhe ngibhadala izikwelede engazenza kuqala. Isifiso sami yikuthi ngabe basinike amalanga salungiselela kuhle ngoba asazi ukuthi kuyabe kusitjhatha isikhathi esinganani.”
UMnu. Mkhokheli Ndlovu uthi okwethusayo okwamanje yikuthi sokugcwele abantu enzikini yedolobho lakoBulawayo abadinga ukudla.
“Indaba yelockdown leyi iyahlupha kakhulu ngoba isidala ukuthi kube lepanic indawo yonke kulehungahunga ukuthi izabanini so abantu sebesenza ipanic buying yonke indawo ngoba sebegcwala etown bedinga ukudla. Lokhu kuyadala ukuthi imemetheke iCOVID 19.”
Othenga ethengisa impahla etshiyeneyo, uNkosikazi Qiniso Ndlovu, uthi abantu kumele baphiwe isikhathi sokuthenga ukudla nxa uhulumende efuna bahlale ezindlini.
“Amahungahunga abangela abantu ukuthi bapanic kakhulu, kodwa njengathi abantu abathengisayo kunzima kithi loba abantu bepanic kunzima kithi. Abanye bayehluleka ukungena edolobheni bethenge izinto zabo akufanani I business islow. Uqala kwakudojwadojwa kungafani abanengi sidla ngokuthengisa kuyasi affecter kakhulu.”
UNkosikazi Similo Tshuma uthi sebethenga ukudla belungiselela eyinye njalo iLockdown.
“Mina khathesi angisoze ngithi silimelele leli ilanga ngoba uPresident kakayenzi I announcement ukuthi kuzaba lelockdown so thina sizwa nje ngelikabathi. So ukuthi sithi thina sizimisele ngoba Nginjenje angikathengi ngitsho impuphu ukuthi abantwabami bedle ngoba kungathiwa kusasa kuyavuka kuvaliwe etown angazi ukuthi lemuli yami siyakudlani kuzaba nzima kakhulu.”
UMongameli Emmerson Mnangagwa watshela abalandeli bebandla leZanu PF ngeviki ephelileyo ukuthi uhulumende ulakho ukuqinisa iziqondiso zohlelo lokuvalela abantu ezindlini esenzela ukuvimba ukumemetheka komkhuhlane weCOVID-19 eZimbabwe.
Your browser doesn’t support HTML5
Udaba Esilethulwe nguBathabile Masuku