Abezempilakahle bathi abantu abanengi kabasawesabi kakhulu umkhuhlane weCOVID-19, omemetheka okwethusayo emhlabeni wonke jikelele.
Uhlangothi lwezempilakahle luthi eZimbabwe kulabantu abedlula inkulungwane eziyisificaminwemibili - 8,498 asebahlolwa batholakala bele COVID-19. Luthi kunani leli, sebefika phose inkulungwane ezifanayo - 7,995 asebaphepha kumkhuhlane weCoronarivus. Uhlangathi lolu lubika njalo ukuthi abedlula amakhulu amabili lamatshumi amahlanu – 251 sebabhubha.
Emhlabeni wonke jikelele, isibhedlela seJohns Hopkins University sibika ukuthi sokulabantu abafika izigidi ezingamatshumi amahlanu – 50 million asebahlolwa batholakala bele COVID-19. Abedlula isigidi – 1,2 million sebabulawa ngumkhuhlane lo.
Abezempilakahle bathi umemetheka ngamandla umkhuhlane lo emazweni atshiyeneyo ngoba abantu bayehluleka ukuzivikela. UDokotela Garry Shava uthi eZimbabwe abanye abantu kabasalandeli iziqindiso zohlangothi lwezempilakahle ukwenzela ukuzivikela kukhuhlane weCOVID-19.
“Ngibona lokhu kubangelwa yikubana awuzange umemetheke ngendlela akade sicabangela yona. Okwenze kwaba njalo yikubana abantu babelandela izimiso ezazivele zikhona. Osekuzakwenzakala manje yikubana umkhuhlane lo usuzamemetheka ngesiqubu esikhulu. Nxa sikhangela kwamanye amazwe anjengabo Italy laboBritain, asebuyelile kuLockdown ngenxa yokuthi asesiba labayithi yi-second wave of infection. Okuveza ukubana inani labantu asebelawo lumkhuhlane lo, usungezelela.”
UDokotela Shava uthi akumelanga abantu bayekethise iziqondiso zokuzivikela kumkhuhlane weCOVID-19.
“Ngokunjalo lakithi lapha sikhangelele ukuthi kuzakuba lento efananayo, ukubana sizabona inani kumbe ngithi ama cases of abantu abale COVID-19, lizakungezelela. Lokhu kubangelwa yikubana abantu sebeyekethisa. Ungakhangela emitshoveni, ebhasini langendaweni zokuthengela, ezitolo, abantu sesisiya sibuthana, sesiya sibambana sibanengi. Sekusiba nzima ukubana umkhuhlane lo ubambeke ngendlela kade ubambeke ngayo. Osekuzakwenzakala yikubana sesizabona inengi labantu lisiba lawo.”
UMnu. Mlungisi Dube, ohlala koBulawayo, uthi kunengi okwenza abantu bengalandeli iziqondiso zokuzivikela kumkhuhlane weCOVID-19, ezafakwa yinhlanganiso ebona ngezemikhuhlane emhlabeni wonke jikelele eyeWorld Health Organization.
“Kodwake sibe sesinanzelela ukubana abantu abanengi beZimbabwe sihlala sise malayinini, sinanzelela kakhulu endaweni ezinje ngamaBank, sinanzelele ukuminyana okunje ngasezintweni ezinje ngamabhasi, ama public buses. So, izinto zonalezi yizinto okumele zikhangelisiswe ukubana kuyalungisiswa ukubana kungahlali kulamalayini, kungahlali kuminyene endaweni ezinjalo ukubana umkhuhlane lowu ungamemetheki phakathi kwelizwe. ”
Ikhomithi ebona ngokuvimba umkhuhlane weCOVID-19, elenhlangothi ezimbalwa ezikahulumende, ikhangelelwe ukuthi izakwenza imikhankaso emaphandleni lapho ezethulela abantu indlela ezitshiyeneyo zokuzivikela.
Your browser doesn’t support HTML5
Abantu Kabaseyesabi iCOVID-19