Sokulabantu abangamatshumi amathathu lasithupha – 36 – asebetholakale belomkhuhlane weCoronavirus COVID-19 eZimbabwe. Kulabafika phose itshumi asebesilile.
Abantu abane babhubha. UMnu. Nick Mangwana, umabhalani wohlangothi olubona ngezokwethulwa kwemibiko, uthi sokuhlolwe abantu abafika phose amatshumi amabili. Lokhu abantu bevalelwe ezindlini uhulumende ezama ngamandla wonke ukunqabela ukumemetheka komkhuhlane weCOVID-19.
Kulabanye abantu abakhala ngokuswela ukudla lokunye okutshiyeneyo.
Omunye wabo nguNkosikazi Ndlovu ohlala eNyongolo Village eMatabeleland South.
Bakhala ngokufanayo eLupane, Tsholotsho, Gokwe, lezinye indawo. UMnu. Nkululeko Mafu ngomunye wabo.
UMnu. Vusumuzi Ncube ohlala eTsholotsho laye ukhala okumangalisayo.
Kodwake uMnu. Believe Gaule webandla leZanu PF uthi uhulumende uyazazi izikhalazo zabantu elizweni lonke jikelele.
Kusenjalo, akwaziwa okuzakwenziwa ngamapholisa alokhu ehlolisisa udaba lokutshaywa kabuhlungu kwabantu ababili eCowdray Park koBulawayo abatshaywe ngamapholisa. Bekumele bamiswe emthethwandaba izolo kodwa udaba lolu kukhanya lungahanjiswanga ngemfanelo. Igqwetha elilwela ilungelo likazulu, uMnu. Matshobana Ncube, uthi kumele kujeziswe labo abatshaye omama laba.
UNcube uthi akuvunyelwa ukutshaya abantu abadinga ukudla labanye nje ngaphansi kweziqondiso zokuvalelwa kwabantu ezindlini olweLockdown.
Uzulu usehlale isikhathi eside evalelwe ezindlini ngesikhathi ilizwe leZimbabwe lamanye amazwe evimba ukumemetheka komkhuhlane weCoronavirus osugulise abantu abedlula izigidi ezine njalo wabulala abafika phose inkulungwane ezintathu – 279,593 emhlabeni wonke jikelele.
Sokulabantu abafika phose inkulungwane ezingamatshumi ayisitshiyangalo mbili – 78,794 asebebulewe ngumkhuhlane lo eMelika. Umkhuhlane lo usugulise labanye abasebenza loMongameli Donald Trump.
Your browser doesn’t support HTML5
Liyakhuphuka inani labantu abalomkhuhlane weCoronavirus