Sokwengezelelwe ezinye njalo insuku zohlelo lokuhlala ezindlini eZimbabwe kusenzelwa ukulwisana lomkhuhlane weCoronavirus COVID-19.
UMongameli Emmerson Mnangagwa wethule lokhu kumabonakude ngoLwesihlanu lapho abike ukuthi kukhangelelwe ukuthi amanye amankampani azavulwa ngoMvulo ozayo njalo uhulumende ufisa ukuncedisa amankampani ngemali efika phose amabhiliyoni angamatshumi amabili – ZWL$18 billion.
Uthi kukhangelelwe ukuthi abantu bahlale ezindlini ukwenzela ukuvimba ukumemethe komkhuhlane lo osogulise abantu abangamatshumi amane eZimbabwe. Usubulele abane kwathi abahlanu basila.
UMnangagwa uthi izikolo zizabe zilokhu zivaliwe kuthi njalo amankampani avulwa ngoMvulo azakhangelwa sonke isikhathi ukuthi kawamemethekisi umkhuhlane weCOVID-19.
Ukhuthaze ukuthi abantu bonke abaya emphakathini kumele bagqoke ama masks sonke isikhathi ukuze kuvinjwe ukumemetheka komkhuhlane lo.
Lokhu ngokwesibili ukuthi kwengezelelwa insuku zohlelo lokuhlalisa uzulu ezindlini.
Abantu abedlula izigidi ezintathu sebegula umkhuhlane weCOVID-19 emhlabeni wonkejikelele.