UMongameli Emmerson Mnangagwa uthi luqhubeka kahle uhlelo lokuvimba ukumemetheka komkhuhlane weCoronavirus COVID-19 eZimbabwe.
UMnangagwa, owethekelele indawo ezitshiyeneyo ngeSonto eHarare, ubehamba leziphathamandla zikahulumende ezimbalwa.
UMnu. Nick Mangwana, usibalokhulu wohlangothi lukahulumane olubona ngokwethulwa kwemibiko, uthi uMnangagwa uncome kakhulu okwenziwa ngabantu okumele bahlale amalanga angamatshumi amabili lanye ezindlini kusenzelwa ukuvimba ukumemetheka komkhuhlane weCoronavirus.
“UMnangagwa uhambe endaweni ezitshiyeneyo ezinjenge Mabvuku, Tafara, Warren Park kanye leChitungwiza. Esikubonileyo yikuthi eMabvuku bekulabantu abadinga amanzi labagcina umthetho kukhansili kodwa kwezinye indawo bengulemapholisa lobanje abantu kade besenza okumele bakwenze. Bekungela bantu ezitolo kuthi-ke abantu bebelunguza imota ezikhaphe umongameli bengahlangani labanye. UMongameli uthakazelele okwenzakala endaweni ezinengi esithi kuyabongeka.”
Okwamanje kulabantu phose abalitshumi asebebanjwe ngumkhuhlane weCoronavirus eZimbabwe. Omunye wabo eselamaviki ambalwa wabhubha.
Uhlangothi lwezempilakahle luthi abantu abatholakala belomkhuhlane lo bahlala eMatabeleland North, Mashonaland East leHarare.
Kudaba olufanayo, uDokotela Sekai Nzenza, ophethe uhlangothi lukahulumende olubona ngezamafekithali, uthi amankampani aqakathekileyo lokhu evuliwe njalo labalimi bayavunyelwa ukuthengisela uzulu okudliwayo.
Isibhedlela seJohns Hopkins University sithi kulabantu abedlula isigidi lamakhulu amabili 1,2 million emhlabeni wonke jikelele abalomkhuhlane lo. Umkhuhlane weCoronavirus usubulele abedlula inkulungwane ezingamatshumi ayisithupha lengxenye – 66,500, emazweni atshiyeneyo.
Your browser doesn’t support HTML5
Ingxoxo Esiyenze loMnu. Nick Mangwana