Iwofisi yommeli weZimbabwe kwele South Africa isisungule uhlelo lokuvulela abantu abanengi abafuna ukuthola incwadi zokuzalwa lezokuhambisa amaphasipoti.
Ngokutsho kombiko owethulwe nguConsul General, uNkosikazi Melody Chaurura, kusukela ngoLwesibili kuze kuyefika umhlaka 24 Lwezi iConsulate yeZimbabwe eJohannesburg izavulwa malanga wonke kugoqela loMgqibelo langeNsonto kusukela ngo06:30 ekuseni kuze kutshaye 4 o’clock ntambama.
Lesi sikhathi sivulelwe bonke abafuna ukuthola incwadi zokuzalwa – amabirth certificates lamaphasipoti.
Inani labantu abasizwa yile ihofisi ngosuku lizakwengezwa lisuka ku 375 lisiya kwayinkulungwane (1,000).
Ngokombiko owethulwe yiConsulate bonke abafuna ukuthola amaphasipoti lencwadi zokuzalwa kuzafuze babhalise kukheli yebulenjini be internet ethi www.zimbabweconsulate.co.za/appointment. Likheli izavulelwa bonke abafuna ukubhalisa ngo 4 o’clock emini. Obhalisayo kuzafuze abhale amagama njengokufaka kwayo esithupheni ukuze angakhonjwemuva eseseConsulate.
Akekho ozavunyelwa ukuguqula ilanga lesikhathi asiphiweyo sokuza eConsulate.
Umngcinisihlalo wenhlanganiso emela izizalwane zeZimbabwe KweleSouth Africa eyeZimbabwe Community in South Africa, uMnu. Ngqabutho Mabhena, uthi lelinyathelo lizaphathisa kakhulu abanengi.
“Selokhu kwaqala icovid iConsulate ibithatha abantu abangu375, njalo i-online appointment ibisenziwa ngolweSithathu ngo4 ntambama. Nxa sekudlule imizuzu emihlanu kuyabe sekugcwele. Sicabanga ukuthi lokhu kuzakwenza ukuthi abantu abanengi banelisi ukuthi bathole i-appointment njalo kfuthi benelise ukuyathatha amapassport forms bathathe lama birthcertificates.”
Umgcinisihlalo wenhlanganiso alwela amalungelo abesifazana eye Zim Imbokodo, uNkosazana Victress Mathuthu, uthi kuhle lokhu ngoba abantu abanengi abafuna amaphasipoti bese bedlelwa izimali ngotsotsi abahle bavimbe izikhala zonke zokubhalisa.
“Abantu abanengi sebedlelwe izimali ezinengi kakhulu ngabantu abathi bayabasiza ukubooker. Babookelwa ngabo R300 umuntu abooke i-appointment eyodwa. Okwenza njalo yikuthi bekunzima ukuthi umuntu akwazi ukuthi abooke i-appointment yokuya eConsulate. Nxa sekuzathi kuthathwe abantu abayinkulungwane ngelanga kulalabo akade bethathwa beyi375 ngelanga kutsho ukuthi sizabona umehluko kakhulu. Siyakujabulela lokho.”
Kodwa-ke uMathuthu uthi nxa kungalungiswanga eZimbabwe lapho okuzaphuma khona amaphasipoti loluhlelo ngeke lusize ngalutho.
“Akwenziwe phela kusheshiswe langale eZimbabwe ngoba abantu bangaze bathole amafomu beyinkulungwane ngelanga nxa iZimbabwe ingakwazi ukuthi emahofisini amaphasipoti kuthathwe amafomu angu1,000 ngelanga kwenziwe lawo maphasipoti lamabirth certificate angu1,000 ngelanga, bazohlala abantu bephethe amafomu abo ngezandla besekusibanzima ukuthi bayesubmita emahofisini amabirth certificate lawamaphasipoti eZimbabwe.”
I-Consulate ithi abafuna ezinye izinto ezinjengeTemporary Travel Documents (TTD), lokunye akudingeki ukuthi babhalisele ukuzothola lolusizo kodwa bona basizwa kuphela phakathi kweviki kusukela ngo 9 o’clock ekuseni kusiya ku 11.30.
Your browser doesn’t support HTML5
Udaba Esilethulelwe NguThuso Khumalo