Kube lokuxokozela okumangalisayo koBulawayo ngesikhathi ikhomishini ethapha imibono kazulu ngokubulawa kwabantu ngamasotsha eHarare isenza umhlangano lezakhamizi.
Kubotshwe abantu abahlanu, okugoqela uMnu. Siphandla Mafu, otshele ikhomishini le ukuthi wabulawelwa abazali nguMnu. Emmerson Mnangagwa ocatshangelwa ukuthi waphatheka kumbhuqazwe weGukurahundi.
Okwethulwe nguMafu kuvuse umsindo omangalisayo, ikakhulu kulabo abasekela ibandla leZanu PF abathe uMafu kumele atsho ukuthi wabona ibutho leli libulala abazali bakhe.
Ikhomishini le, ekhokhelwa nguMnu. Kgalema Motlanthe, owayengumongameli wakwele South Africa, imise umhlangano lo okwesikhatshana amapholisa abopha abalandeli bebandla leMthwakazi Republic Party abane – uWelcome Moyo, Mayor Ncube, Terrence Wisdom Mkhwananzi loMarshall Sibanda.
Bavalelwe enkambeni yamapholisa eye Bulawayo Central Police Station. Akwaziwa ukuthi bazakwetheswa icala lani.
Kuthe kuphela umhlangano lo, uMafu ubotshwe ngamapholisa amhambise enkambeni le. Sehlulekile ukukhuluma ngamapholisa ngodaba lolu.
UProfessor Lovemore Madhuku, okukhomishini le, uthe akulunganga okwenzakale koBulawayo ngoba bafuna ukuthapha imibono yabantu ngokuthula.
Ibutho labulala abantu abayisithupha kulabanye ababetshengisela emigwaqweni besola ngokungethulwa ngokutshetsha impumela yokhetho lukamongameli.