Sebelungiselela ikhefu leKhisimusi eZimbabwe loba limemetheka ngamandla igciwane leCOVID-19 elibulele abantu abathathu izolo elizweni.
Abantu abanengi bathi bazalandela iziqondiso zokuzivikela kumkhuhlane weCOVID-19 ngekhefu leKhisimusi kube labanye njalo abathi kunzima ukwenza lokhu ngesikhathi behlangana lezihlobo labangane. Bathi bayakunanzelela ukuba liyamemetheka igciwane leCOVID-19 eZimbabwe lemhlabeni wonke jikelele ngakho-ke lilakho ukumemetheka ngamandla ngesikhathi sekhefu leKhisimusi.
UMnu. Joseph Dube, ohlala koBulawayo, uthi akumelanga abantu bebuthane ngekhefu leli.
"Angiboni kuyinto enhle ukuhlanganisa abangane lezihlobo ngeKhisimusi, sisenza imithimba ethize ngesikhathi lesi seCOVID. Kungasi COVID yodwa esiyesabelayo, leFlu leyi esigcwele indawo yonke."
UMnu. Pasture Mpofu uyakusekela lokhu.
"Mina, because of this new I-VIARIANT ye OMICRON plus lomdala ongezwa kuhle, angithandi ukuthi ngimbeke engozini kakhulu. So it's just Christmas with i-inner circle yefamily yethu, ngiyabe ngingavakatshi kangako, just going to be there labazali endlini, just enjoying the meals zeChristmas, a ngithi uyakwazi ukuthi ziyabe ziyi seven colours, just that. Ngizabe ngiziphumulele nje endlini.”
Kodwa uNkosikazi, Agnes Mlilo, uthi uyabe ezijabulela lezihlobo loba limemetheka igciwane leCOVID-19.
"Angiboni ukuthi iCORONA iyedlula leyi, 5years, so litsho ukuthi singaqeda 5 years singavakatshelanga ama-friends ethu le family?. Hayi ke mina ngiyavisithela i-family yami.”
UNkosazana Odeta Ngowe laye uthi uzahlangana lezihlobo ngekhefu leKhisimusi.
"Lenelikhefu leChristmas sizayenza lokho esakwenza ngomnyaka ophelileyo, odlulileyo. Sahlangana lezihlobo, sawosa inyama, sajabula thina, COVID or no COVID.”
UJunior Moyo uthi uzakwethekelela labo acabangela ukuba kabala gciwane leCOVID-19.
"Mina engingakwenza yikuthi, ngiyakhuluma lezihlobo labangane ngibabuze ukuthi bona basesimeni esinjani, lami ngizihlole ukuthi ngisesimeni esinjani and then if phakathi kwethu kungela oleCOVID ngizokhona ukubavakatshela but if kuyabe kulole COVID, lami angingeke ngivakatshe ngoba ngizobe ngingafuni ukuba leCOVID.”
UNkosikazi Martha Sibanda, ohlala eCowdray Park koBulawayo, uthi kayisoze ibemnandi iKhisimusi yalonyaka ngoba abantu besesaba ukuhlaselwa ngumkhuhlane weCOVID-19.
"Ngibona ingani ayisoze yajabulisa kakhulu ngoba abantu abasoze bachelese ngendlela abakhangelele ngayongendaba yeCOVID. Abanye futhi izihlobo, bazayehluleka ukuvakatshela ezinye izihlobo especially labo abasemazweni ukuthi bafinyelele ukuzofika ngapha eZimbabwe kuyabe kunzima kakhulu ngendaba ye COVID. Ngibona engani okunye abazabe bekwenza abantu,yikuthi abantu bazabe bezihlalele ezindlini zabo, ngendlela yokuthi besesaba umkhuhlane weCOVID.
Kuyabe kungelabantu lonyaka emzini kaNkosikazi Loice Mabhena ngenxa yeCOVID-19.
"Ngoba ngenxa yomkhuhlane lowu omemethekayo kakhulu weCOVID-19. So mina lemuli yami, ngibona sisadlala sisodwa lemuli yami, singavakatshanga njalo okunye, izihlobo zethu ezikhatshana, kababuyanga. Thina silokuthi nxa izihlobo zingabuya sihlangane, sibebanengi, kudliwe kube mnandi, kujatshulwe but lonyaka hayi, kuzabe kulomahluko. So mina sengibona kungcono ukuthini, lemuli yami sizihlalele, sithenge khonokho okuncane, sizidlele. Okunye, sibone ukuthi siyathengani, amabhuku lani, lani, izinto zesikolo ngoba isikhathi sakhona sicane, izikolo ziyavulwa khathesi. So ngibona kungcono ukuthi thina sizazihlalela lemuli yami, sidle okusaneleyo, ilanga lidlule eleKhisimusi, silungiselele okwesikolo.”
Abezempilakahle baxwayisa abantu ukuba bengayekethisi iziqondiso zokuzivikela kumkhuhlane weCOVID-19 otholakale ebantwini abedlula inkulungwane ezimbili – 2,106 izolo eZimbabwe.
Your browser doesn’t support HTML5
Sebelungiselela Ikhefu leKhisimusi Loba Limemetheka Ngamandla Igciwane leCOVID-19