Kulabantu abadlale nzima usuku lweKhisimusi izolo kuthi njalo abanye bebelezihlobo labangane ngesikhathi umhlaba wonke jikelele ulwisana legciwane leCOVID-19.
Ngalesikhathi somnyaka kuyabe kuyisiphithiphithi, kulemcimbi etshiyeneyo abantu besidla okumnandi, kugidwa ezindlini ezinengi, kujabulelwa usuku lweKhisimusi. Lonyaka bekuthule. Abantu bathi bebengela mali. Uyakhala uNkosazana Sandra Sibanda.
"IChristmas siyidlale nzima komile, so asazi ukuthi siyayenza njani kodwa hayi inkosi isgcinile. Umnyaka 0zayo kumele kube kuhle sizabona ukuthi sizasebenza njani."
Kwezinye imuli kulala umangoye eziko. UMnu. Kenny Dube kazi ukuthi ayinikeni imuli yakhe.
"Hayi iKhisimusi siyidlale ngendlela esingafisi ngayo akulamali njengoba lisizwa labantwana bayakhala lapha bakhaliswa yindlala. Siyazama ngakhonokhu okukhona kodwa hayi akweneli."
Ugogo Wodumo koBulawayo, uRose Nyathi, udlalele iKhisimusi endlaleni ngoba abajayele ukumthumela ukudla kabamnikanga lutho lonyaka.
"IKhisimusi ngiyidlale kabuhlungu sibili, ngangithemb'ukuthi engxenye lizangifakela something, ngitsho loyedwa phakathi kwenu umhlaba wonke owangifakelayo. Angikwazi ukuthi kanti sekwenze njani kumbe yikaka, ikaka yonale isilixotshela khatshana isisenza ukuthi ngilinukele. Kanti izolo ngiqalisa belisithi lingezwa ngikhala seliphosile, lingezwa ngikhala seliphosile, kanti khathesi kuyini?"
UNkosikazi Gracious Ndlovu yena ufelwe yisihlobo. IKhisimusi ukhohlwe ngayo.
"Ayi iChristmas ibiright nje but khonokhu ukuthi ibibhowa abantu abalamali. Bengilo khazeni wami but inkinga yikuthi sifelwe. Ah! Ukudla bekukhona nje ukuthi abantu bedle but ukuthi sikholise ade kungakholiseki njoba lokhu sifelwe."
Kukhona akade betshadisa ngeKhismusi. UNkosazana Irene Maseko ubesemtshadweni.
"Hayi iKhisimusi yethu ibimnandi. Besitshadisa umnawami othethwe likhiwa eNew Zealand. Hayi sidle sibili sakholisa kwajayivwa hayi kwaba mnandi. Sibe lelang'engelihle sibili."
Ugogo uMadawu uthi ujabule kakhulu ngekhisimusi ngoba uze wangcinda wadla inyama ngemva kwesikhathi eside.
"Ngidlale kuhle sibili bengilezikhubo emoyeni wami ngisele ngikhululekile emoyeni wami ngoba bangihlabele inyama imbuzi basilungisela kuhle sajabula sachelesa. Kuthe ntambama ama supa ye banginike 2 lami ngazibona ngichazeka. Ngithe ngisizwa sengilobithongo ngezwa kusithi hambozilalela ngabengisukuma ngisiyalala. Ngijabulele nje ukuthi umnyaka uphele kuhle lami ngilempilo abanye asiselabo sebesitshiyile."
Amasela abamba inkunzi lawo athi lonyaka bekunzima. Bebengela lutho ngeKhisimusi. UMnu. Bongani Moyo lisela koBulawayo.
"IKhisimusi ibinzima lonyaka izinto zomile elizweni even laphandle lapha nxa sigijima gijima vele ubambumuntu othole lomuntu wakhona kalalalutho uyazihawUlela, uyazidubekela. Thina abanye vele siphila ngenkuzi khonalapha. Nxa uthi uyabamba umuntu vele uthole umuntu wangkhona vele laye kala lalutho ngitsho lezicathulo uyabe egqoke lezicathulo ezidabukileyo. abantu abalakudla, bafile ngendlala."
Ngempela inengi labantu lithwele nzima. Imali ayikho eyokuthi bazithengele abakufunayo njalo iKhisimusi yalonyaka ibiziqandela kubuye futhi besesaba ubhubhane olumemetheka okwesabekayo, umkhakha omutsha weCovid-19 okuthiwa yiOmicron.
Your browser doesn’t support HTML5
Bafuthelele Abantu Ngekhefu leKhisimusi