Imidlalo yenguqu kusigaba seCastle Lager Premier Soccer League ingena kuviki lesikhombisa kulimpelaviki kulomdlalo ogobhozisa amathe phakathi kweqembu leCAPS United lele Dynamos esigodlweni iHarare.
Kujwayelekile ukuba imidlalo yenguqu phakathi kweqembu leCAPS United lele Dynamos ibe yindaba esegudwini ngoba lawa kungamanye amaqembu amakhulu elizweni leZimbabwe njalo esaziwa ukuba abhekane njengenja lengwe.
Lonyaka kodwa ngenxa yendlela lawa maqembu aqale ngawo imidlalo yawo kusigaba seCastle Premier Soccer League umlandeli womdlalo wenguqu uBekezela Dube uthi kuzakuba yisimanga nxa umdlalo wangeSonto ozakuba phakathi kwalawa maqembu ungabukelwa ngabalandeli abagcwele phamu enkundleni.
“Le yi derby nje ngebizo ngoba kuzakuba nzima ukuba lumdlalo ufane loweminye iminyaka ngenxa yendlela lawa maqembu aqale ngawo imidlalo yawo yalonyaka.”
Imidlalo ye Castle Lager Premier Soccer League iyaqala ngoMgqibelo njalo amaqembu azadlala ngokulandelayo.
Iqembu leNgezi Platinum Stars lizadlala lele Mutare City ngase Baobab, ele ZPC Kariba lizemukela ele Chicken Inn ngase Nyamhunga, iqembu le Yadah lizadlala lele Nichrut, iqembu leBulawayo City lizangqikilana lele Triangle ngase Barbourfields, iqembu le Harare City lizadlala lele Black Rhinos kuthi ele Bulawayo Chiefs lizadlala lele FC Platinum ngase Luveve.
Kweminye imidlalo yangesonto iqembu le Chapungu lizemukela ele Herentals ngase Ascot kuthi iqembu leHighlanders lizadlala lele Shabanie Mine ngase Barbourfields.
Your browser doesn’t support HTML5
Udaba Esilethulelwe NguJoseph Njanji