Abancintisa kukhetho lwama by-elections oluzaqhutshwa ngoMbimbitho sebekhankasa ngamandla koBulawayo, okudingwa amakhansila labazamela indawo ezitshiyeneyo edale lephalamende.
UMnu. Richard Ncube, omunye wabancintisa kukhetho lokudinga ozamela iPumula, uthi abantu kumele beotele ibandla leZapu eliyilo elaletha uzibuse kwele Zimbabwe.
UNcube uthi sesifikile isikhathi sokuthi uzulu azibuse njengalokhu okwathenjiswa abantu ngesikhathi sempi yenkululeko.
Uthi kunengi azakwenzela abantu abahlala ePumula lamanye amalokitshi engakhethwa nguzulu ngoMbimbitho lonyaka.
UNcube, okubandla leZapu, uncintisana loMnu. Albert Mhlanga okumanyano weMovement for Democratic Change Alliance.
UMhlanga uthi uzimisele ukumela abantu esigabeni lesi njengalokhu akwenza emele iPumula edale lephalamende.
Uthi wasebenza labantu abanengi abagoqela umuyi uMorgan Tsvangarai, umuyi uGibson Sibanda labanye ababafisa ukuba kube lozibuse ogcweleyo eZimbabwe.
Okubandla leZanu PF, uMnu. Maqhawe Sibanda, uthi ibandla lakhe lizathwalisa nzima aphikisayo okulenkokheli okukhanya ilwela izikhundla.
Ukhetho lwama by-elections lwadalwa yikuxotshiswa kwamalunga edale lephalamende lamakhansila libandla leMDC-T elikhokhelwa nguMnu. Douglas Mwonzora.
Kwwezinye indawo kwabhubha ababemele uzulu kumakhansili lakudale lephalamende.
Your browser doesn’t support HTML5
Sebekhankasela Ukhetho Lwama By-elections