Ikhansili yedolobho lakoBulawayo yenze umhlangano lezakhamizi kanye labosomabhizimusi ngoLwesibili lapho okuhlafunwe khona uluhlu lwendleko yayo olwebudget yomnyaka ozayo.
Ikhansili ichazele abasemhlanganweni lo ngenhlelo abakhangelele ukuzenza emzini wakoBulawayo beqakathekisa ukutholisa uzulu amanzi ahlanzekileyo, ezempilakahle, ukuthwalwa kwamanzi alengcekeza, ukutholisa uzulu indawo zokwakha izindlu, imiwaqo, ezemfundo lokunye.
Basemhlanganweni webudget yako Bulawayo.
Umqondisi ophethe isikwama semali yekhansili, uMnu. Kempton Ndimande, uthe bakubone kuqakathekile ukuthi bachasisele uzulu labosomabhizimusi ngebudget yomnyaka ozayo ukuze bazwisise konke okungenziwa lidolobho leli elilakho ukukhuphula imithelo embalwa.
Uthe umthelo wezindlu ozakhitshwa yizakhamizi zakoBulawayo bafisa ukuthi ukhuphuke ngokuhlanu ekhulwini.
“Ikhansili yakoBulawayo ikhweze inhlawulo yezindlu ngokuhlanu ekhulwini njalo lokhu kuzakwenza ukuba lenhlelo esizazitholisa uzulu bazasuthiseka ngazo labo bazabona ukuba imali yabo iyakuphi.”
Abantu abasemhlanganweni webudget koBulawayo.
Usomabhizimusi wakoBulawayo, uMnu. Thembinkosi Wena, uvumelane lokumenyethwe kubudget yakoBulawayo esithi ibalulekile.
“Kuhle ukuba ikhansili isibizile sazoxoxa leziphathamandla zekhansili njalo akukho esikusolayo kubudget abaphume layo njalo loba bekhwezile intengo yokuhlawulela izindlu akutsho ukuthi yibo akahwezileyo kodwa isimo somnotho welizwe yiso esibangele lokho.”
UNdimande uthe ekuqaleni kwalumnyaka izakhamizi bezilezikwelede kukhansili ezifika izigidi ezilikhulu lamatshumi edlula kancane ayisikhombisa zamadollar -$172 milllion.
Uthe lesi sikwelede sakhuphuka saya kuzigidi ezilikhulu lamatshumi phose athobaminwembili amadollar - $176 million - ekupheleni kukaNcwabakazi.
Inengi labasomabhizimusi abangene lumhlangano bancome ibudget yekhansili yako Bulawayo besithi izamile ngamandla wonke ukusebenzela uzulu walelidolobho nanku likhokhela emadolobheni alondoloza ukuhlanzeka elizweni.
Bakhuthaza ukuthi umanisiphala engayekethisi ngoba zikhona ezinye indawo ezilengcekeza lezifuna ukulungisiswa. Osomabhizimusi laba bacele njalo ikhansili ukuba ilandele ibudget le ekhanya ibukeka.
Your browser doesn’t support HTML5
Ikhansili Yako Bulawayo Yethulela Uzulu iBudget Yomnyaka Ozayo