Izizalwane zeZimbabwe ezinengi zithi kaziboni uMnu. Patrick Chinamasa umphathintambo wezemali ephuma loluhlu lokusetshenziswa kwemali yelizwe – inational budget ngoLwesine ekhangelane lenhlupho zikazulu.
Abakhulume leStudio 7 lamuhla bathe kuzaba nzima ukuthi uChinamasa adinge imali yenhlelo zikazulu ngesikhathi amankampani amanengi evalwa ngenxa yokwehluleka ukwenza impahla ethe xaxa yokuthengisa.
Abanye bacabangela ukuthi uChinamasa uzakhuphula kancane imithelo yegwayi lotshwala obuthengwa emazweni ukwenzela ukuthi avuselele isikhwama semali yelizwe.
UChinamasa owethula uluhlu lwemali yokusetshenziswa elizweni nyakenye, wayekhangelele ukuthi umnotho welizwe uzakhuphuka ngesilinganiso sokuyisithupha ekhulwini–6% ngomnyaka ka2014.
Kodwa-ke lokhu akwenzakalanga ngaleyo ndlela njengoba umnotho welizwe ukhangelelwe ukuthuthuka ngesilinganiso esedlula okubili ekhulwini–2.6% lonyaka.
Inhlanganiso yeInternational Monetary Fund isanda kubika ukuthi ilizwe lithwele nzima ngokudinga imali yokuqhuba inhlelo ezitshiyeneyo. Zinengi izizalwane zeZimbabwe ezicabanga ukuthi loba kunjalo, uChinamasa uzazifaka emcabangweni wakhe nxa esethula uluhlu lokusebenzisa imali yelizwe olwe budget yalonyaka.
Ingcwethi kwezenotho uMnu. Rejoice Ngwenya weLiberal Market Solutions utshele iStudio 7 ukuthi uChinamasa uphakathi kwelitshe lembokodo.
UMnu. Morris Ngwenya webandla leZanu PF uthi uChinamasa ulakho ukwethula umbiko ozathokozisa abasungula amabhizimisi.