Ilizwe leBhilithani lithi lizimisele ukuthi lincedise eleZimbabwe ukuba libuyele kunhlelo zokubolekana imali ngaphansi kwenkampani yeInternational Monetary Fund (IMF).
Lokhu kwethulwe nguNkosikazi Catriona Langa, omele ilizwe leBhilithane kwele Zimbabwe, emhlanganweni awenze loMnu. Mthuli Ncube, umphathintambo wezemali.
Uthi balakho ukunceda ilizwe leZimbabwe ukuthi libhadale izikwelede zeIMF lamanya amabhanga.
Ukubhadala izikwelede zeIMF, World Bank, African Development Bank lamanye kuqakathekile kakhulu ukwenzela ukuthi ilizwe leZimbabwe liqalise kutsha ukuthola izikwelede zokuthuthukisa umnotho walo.
“Silapha ngoba sifia ukunceda ilizwe leZimbabwe ukuba libuyele kunhlelo zeIMF. Lokhu kungenziwa ngaphansi kwalokhu okubizwa ngokuthi yi-staff monitoring program.”
Uthi bazancedisa ilizwe leZimbabwe ukuba liqalise ukukhulumisana lamabhanga la kulandela ubudlelwano obungaqedakaliyo ngesikhathi kusabusa owayengumongameli uMnu. Robert Mugabe.
Ilizwe leZimbabwe lilezikwelede zamanye amabhanga la efika amabhiliyoni phose ababili amadola - $1.8 billion.
UNcube ubike ukuthi ilizwe leZimbabwe lokhe lizama ukubona ukuthi lingathatha indlela yiphi yokubhadala izikwelede lezi.
Uthe ilizwe leBhilithane lele Zimbabwe alobudlelwano obuvela kude.
“Besikhulumisana ngendaba zenotho, inotho yelizwe njalo ngimbonga ukuthi khona iUK ingumngane oqinileyo oweZimbabwe. Basinike imali engange one billion pounds kusukela ngo2009, yimali enengi kakhulu sibili, siyabonga. Njalo basiphathisa kakhulu ekuzameni ukubhadala izikwelede zethu njalo bayasi sapota ukuthi sikhulume lamanye amazwe ukuthi lawo asizwisise ukuthi sizamanai nxa sikhuluma ngoVision 2030, basincedise.”
Lokhu kugoqela ukuxolelwe ngamabhanga alakho ukwesula izikwelede kumbe ukuzama ukubhadala kancance kancane izikwelede lezi.
Ibhanga leIMF likhangelelwe ukuthi lizakwenza umhlangano oqakathekileyo ngoMfumfu lapho okuzaphuma egcekeni okuzakwenziwa lilizwe leZimbabwe.
Your browser doesn’t support HTML5
Udaba Esilethulelwe NguMavis Gama