UMnu. Brian Nichols, omele ilizwe leMelika kwele Zimbabwe, uthi ilizwe lakhe lingesula izijeziso zenotho nxa ele Zimbabwe lingaguqula eminye imithetho ukuze ihambelane lokumunyethwe yisisekelo sombuso esilotshwe ngomnyaka ka2013.
UNichols wethule lokhu ngoLwesibili ngesikhathi exoxa labatsha oqoqwe yinhlanganiso ye263 Chat eHarare.
“Nxa ilizwe leZimbabwe lingalungisisa imithetho yalo ukuthi ihambelane lesisekelo sombuso esitsha sika 2013 loludaba lungahle lulungisiswe izijeziso zomnotho zisuswe. Okujabulisayo yikuthi uhulumende ukhanya esethatha amanyathelo kuloludaba okungenza ukuthi lezi zijeziso zesulwe.”
Uthi izijeziso ezethulwa lilizwe leMelika ngaphansi komthetho weZimbabwe Democracy and Economic Recovery Act (ZIDERA) ziqakathekisa amalungelo abantu okugoqela okukhuluma bekhululekile, ilungelo lokuba lomhlabathi, ukhetho olukhululekileyo lokujeziswa kwayababe bedale amacala.
Ingcwethi kwezemithetho, uMnu. Methembeni Moyo, obesemhlanganweni lo, uthi ukuguqulwa kwemithetho le kungaba yinto engafuna usekelo oluzwayo.
“Ungananzelela okwatshiwo nguMnu. Patrick Chinamasa engakasuswa esikhundleni wathi yena ukulungisisa imithetho eminengi kulandela isisekelo sombuso welizwe yinto edulayo kakhulu. Ngakho-ke umbono wami yikuthi amazwe afana lelizwe leMelika aphathise uhulumende kulokhu ekubhaleni umthetho kanye lezisebenzi ezilolwazi ezidingakalayo.”
UMnu. Brian Nichols ukhuluma kunhlanganiso ye263 Chat.
UNichols uthi ilizwe lakhe lizimisele ukusebenzelana lele Zimbabwe ekuthuthukiseni umsebenzi wokuhlonitshwa kwamalungelo lomnotho welizwe okungenza uzulu aphile impilo engcono engela kwethuselwa.
Ele Melika lithi liyadana ngodlakela oluqhamuke ngenyanga edluleyo, kodwa laphanga lathi liyamukela ngenjabulo inyathelo lika hulumende lokubumba ikhomishini yokuhlolisisa imbangela yalo okumele impumela yayo ivezwe obala kuzulu.
Abasakhulayo benelise ukubuzisisa ngamathuba akhona kwezemfundo kwele Melika.