Abantu abanengi eZimbabwe bathi bakhathazekile kakhulu ngohlelo lwebhanga elikhulu lelizwe eleReserve Bank of Zimbabwe elifuna ukufaka ama bond notes kumnotho welizwe loba sokusele insukwana zokuthi lokhu kwenziwe.
Bathi mhlawumbe lokhu yindlela yokubisela idollar leZimbabwe elalahlwa ngomnyaka ka2009 sokwethulwa imali yakwamanye amazwe kulandela ukugugudeka kwe dollar lelizwe okumangalisayo.
UMnu. Trust Nhubu, osebenzelana lenhlanganiso zabatsha, uthe kuyaduba njalo kungathatha isikhathi ukuba uzulu ethembele kuhulumende kuloludaba.
UNhubu uthi kudingakala ukuvula indlela zokwethembana kulokuthi uhulumende enze akufunayo.
Unobhala jikelele wenhlanganiso yezisebenzi eye Zimbabwe Congress of Trade Unions, uMnu. Japhet Moyo, uthe bavelela kude bezama ukuba kube lokuzwana kuloludaba kodwa kungekho okuphumayo kuze kube lamhlanje.
Your browser doesn’t support HTML5
Udaba Esilethulelwe NguMark Peter Nthambe
Uthe lokhe bemi kumbono wabo wokungasekeli imali le, ngoba bengaboni uncedo lwayo kuntuthuko yesizwe khona kulendlela ezingcono uhulumende angazilandela ukulungisisa inkinga abhekana lazo kodwa engalaleli.
Uhulumende uthi limali ebimele yethulwe kuyonale inyanga isizatholakala ngenyanga ezayo njengendlela yokuthuthukisa lokusekela abaquba umsebenzi wokuthenga lokuthengisela impahla phandle kwelizwe ikakhulu abembi begolide lamanye amatshe aligugu labalimi abafana labalima igwayi.
Umsekeli kamongameli uMnu. Emmerson Mnangagwa wazise kule iviki ukuba uhulumende kasoze ebuyele emuva kuloludaba ethembisa uzulu ngasikhathi sinye ukuba limali ayitsho ukuphenduka kwe dollar leZimbabwe.