UMnu. Michael Bloomberg, owake waba nguMeya wedolobho leNew York njalo olilunga lebandla lama Democrats, ukhangelelwe ukuthi uzangena kukhetho lokudinga umongameli kwele Melika ngomnyaka ozayo.
Lokhu kukhangelelwe ukuthi kuzaphazamisa ukukhethwa kozamela ibandla lama Democrats kukhetho okuzancintisa uMongameli Donald Trump.
IReuters News Agency ibika ukuthi uBloomberg ufuna ukuthi igama lakhe lifakwe engwalweni zokuvotelwa kukamongameli kungakavalwa ngokusemthethweni ngoLwesihlanu.
UBloomberg, oleminyaka engamatshumi ayisikhombisa lasikhombisa – 77, selesikhathi eside ecabanga ngokungena kukhetho lukamongameli. Okwamanje akaphumeli egcekeni ngazakwenza ngoba ulakho ukuthi abhalise igama lakhe eveza inhlonso yokungena kukhetho loba elelungelo lokwekela lokhu ngesikhathi sokhetho.
Okwamanje kulabantu abalitshumi lasikhombisa abafisa ukukhethwa libandla lama Democrats ukuba bangqikilane loTrump kukhetho lolu.
Abakukhetho lolu bagoqela uMnu. Joe Biden, owayengumsekeli kowayengumongameli uMnu. Barack Obama. uSenator Elizaberth Warrren, uSenator Bernie Sanders labanye. UBiden, uWarren loSanders kukhanya bethakazelelwa ngabantu abanengi abakubandla lama Democrats.
UBloomberg uthi abantu bonke laba abafuna ukuncintisa kukhetho oluzayo bangehluleka ukunqoba uTrump kukhetho lukamongameli.
Kasenelisanga ukukhuluma labo ngodaba lolu.
UMnu. Phithizela Ngcobo, ingcwethi kwezombusazwe ezimele yodwa, uthi akwaziwa ukuthi ngubani ozamela ibandla lama Democrats kukhetho oluzayo.
Your browser doesn’t support HTML5
Ingxoxo Esiyenze LoMnu. Phithizela Ngcobo