UMongameli, Barack Obama wele Melika wethule umbiko wesimo somnotho welizwe iState of the Union Address ngoLwesibili ntambama, lapho aveze khona ukuthi ilizwe selithuthuka ngesiqubu esihle njalo kumele kunanzwe abantu abasebenzayo labafundayo.
UObama, owethule umbiko lo edale leCongress, uthe umnotho welizwe usukhuphuke okwamagama okutshengisa ukuthi ibandla lakhe lamaDemocrats lisebenze kahle selokhe wangenayo esikhundleni.
Ubike njalo ukuthi kumele kukhuphulwe umthelo we tax kulabo abanothileyo ukwenzela ukuthi izithelo zomnotho zitholwe ngabaswelayo njalo kunakakelwe isisebenzi.
Uthe kaboni ukuthi izisebenzi zincitshelwani iholo eligcweleyo nxa zikhumuka emsebenzini ngesizatho sokugula. Uphinde wathi kumele kukhuphulwe iholo labantu abahola imali ephansi kweleMelika.
Uqhubeke ethi sesifikile isikhathi sokuthi kukhuphulwe iholo labesifazane ukwenzela ukuthi lifanane lelabesilisa.
Okunye njalo othi ufisa kwenziwe yikuthi kumele abatwana bafunde bengabhadale emakolitshini amaCommunity Colleges.
Okunye njalo aphathe ngakho yikuqiniswa kwempi yokulwisana lamalwecatsha awokholo lwesi Islam edlulisa amalawulo akwele Iraq lakwele Syria njalo kumele eleMelika livikelwe kwamanye amazwe angathengisi impahla ngemfanelo.
Abaphikisa ibandla lakhe abebandla lama Republicans bathi uObama ubezixoxela echitha isikhathi sikazulu njengoba sebezibambe esidukwini kumadale eCongress leSenate ayenza imithetho yelizwe.
Kodwa-ke isizalwane seZimbabwe esihlala eMelika uMnu. Den Moyo, utshele uGibbs Dube weStudio 7 ukuthi uObama uyitshaye ekhaleni indaba yomnotho welizwe loba nje eyehluleke ukukhuluma ngamalwecatsha ahluphayo ezwekazi leAfrica awe Boko Haram abulala uzulu santando.