Indwendwe ziqhubeka zisanda koBulawayo abahola impesheni lezisebenzi zikahulumende besehluleka ukuthola imali emabhanga ngesikhathi belungiselela ikhefu leKhisimusi.
Amanye amabhanga asengezelela izikhathi zokuvalwa esenzela ukunika abantu laba imali yabo kungakafiki usuku lweKhisimusi.
Okwakhathesi umuntu uvunyelwe ukuthatha inkulungwane ezimbili zamadola ngeviki (ZWL$2,000). Imali le ilingana lamadola alitshumi eMelika (US$10) nxa kusetshenziswa isilinganiso somkambo wemali ongekho emthethweni.
Abasebenza kunhlangothi zikahulumende ezitshiyeneyo labo babhekane lohlupho lolu.
UMnu. Gift Nleya, isisebenzi sikahulumende, uthi ukuze athole limali kumele alale ekudwendwe lokufolela phandle kwebhanga.
Abantu abanengi behluleka ukuthatha imali emabhanga koBulawayo. (Bathabile Masuku)
“Kubi lapha ema-bank, kulalwa khona kuvukwa khona. Nxa ungasalalanga khona imali ngeke uyithole sibili, ungaphuza uthi uyavukela ngo 2am ulakho ukuthi uyiswele. Abantu abakufunayo yi cash, aluba siyathola ama cashback nge Eco cash le swipe kungaba kuhle impela. Khathesi sizama ukulwa leCorona at the same time sifuna imali.”
Umongi, uNkosikazi Unile Gumede, uthi ufika ukuba amabhanga anike abantu imali yabo yonke ngesikhathi sekhefu leKhisimusi.
“Kuviki ezayo siya kukhisimusi, njalo sekuyinjayelo ukuthi abantwana sibathengela impahla nge sikhathi lesi. So khathesi nxa ule cash kungcono ukuthenga iforex yokuyadinga impahla ema flea market. Ngesikhathi lesi vele avathengisayo abakuncengi, into ye$10 uyithenga ngenkalakatha yemali emangalisayo kubuye lama bank charges. Ucina ubona ukuthi ukuthenga nge cash kungcono kakhulu”
UMnu. Thembakuye Moyo, ongumbalisi, uthi indwendwe emabhanga sezidala ezinye indleko ezingahlelwanga ngaphambilini.
“Ama civil servants athwele nzima ukuthi bathole imali yabo ema bank, ama line e bank made kakhulu.Nxa kuphiwa imali kucina kuthole inani elilutshwane. Esesikubona khathesi yikuthi abantu batshona ema bank, sebehlala khona beze becina besidla eyinye imali abangayikhangelelanga.Lokhu kuthwalisa nzima abantu abavele bengela mali.”
UMnu. Ambrose Sibindi, umgcinisihlalo wenhlanganiso yezakhamizi eyeBulawayo Progressive Residents Association, uthi indwendwe zingaphunguka uma kungakhitshwa imigoqo ekhona.
“Kuyadanisa ukubona abantu bekundwendwe ezesabekayo ema bank bedinga imali. Imota lezi ezigadwayo, imitshova labo Zupco bagadwa nge cash ngokunjalo abantu balomlandu wokuthi bathole icash. Kungaba ngcono nxa kungakhitshwa umthetho lo wokuthi kube kuphiwa $2000 ngeviki, abantu kabaphiwe imali enengi ka-1, umuntu azithathele imali yakhe yonke.”
Ingcwethi kwezomnotho zithi umumo lo okhona emabhanga udalwa yikuba uzulu akasela themba kumnotho welizwe kanye lamabhanga, osokwenza ukuba abantu bafise ukukhipha imali zabo zonke emabhanga bazigcinele ngekhaya.”
Badinga imali ebhanga. (Photo: Bathabile Masuku)
Zithi njalo kuyadingeka ukuba uhulumende akhe umnotho welizwe ongathandabuzwa nguzulu, kusetshenziswe imali engahlali isiwa isisindo njalo nje. Mhlaumbe lokhu kunganikeza abantu ithemba lokugcinisa imali zabo emabhanga, okungakhokhelela ekuthini amabhanga enelisa ukuboleka osomabhizimuzi labo abazaqala ukuthuthukisa amabhizimusi abo kulethe imisebenzi elizweni.
Kuvuki ephelileyo udokotela John Mangwiro usibalukhulu webhanga elikhulu ele Reserve bank of Zimbabwe ephendula imibuzo kumhlangano obuqoqwe yikhomishini ebona ngezenkohlakalo, eye Zimbabwe Anti-Corruption Commission uphe isiqiniseko kuzulu ukuba amabhanga elemali eyanelayo eyokupha wonke umuntu.
Wathi njalo okwenza abantu bafune ukubamba imali esandleni kungenxa yalokho okwenzakala ngomnyaka ka 2008 lapho abantu abalahlekelwa zimali ezasisemabhanga okwadalwa yikuwa kwesisindo semali yakuleli iqathaniswa leyangaphandle. Uthe kulendingeko yokuba bazame ukwenza imali yakuleli ibe lesisindo lokhu kuzadala ukuba intengo yempahla layo ihlaliseke ingahlali ikhuphuka njalo nje.
Imali yakuleli iqhubeka isiwa isisindo, emkambo wensitha ikhulu lamadola eMelika (US$100) ilingana lamadola azinkulungwane ezingamatshumi amabili (ZWL$20 000). Kuthi uhulumende isilinganiso sakhe samadola alikhulu eMelika (US$100) ilingana lamadola azinkulungwane ezilitshumi (ZWL$10 866).