UMongameli Emmerson Mnangagwa uthi umuyi uJanet Mbuyazwe Banana, obhubhele eMater Dei Hospital koBulawayo ngoLwesine, wasebenza kakhulu ekukhululweni kwelizwe leZimbabwe elalisezandleni zabamhlophe.
UMnangagwa wethule umbiko lo kulandela ukubhubha kuka Nkosikazi Banana, okuthiwa ubelesifo sezinso.
UMnangagwa uthi wathi esethekelela uNkosikazi Banana endlini yakhe eLuveve koBulawayo esiyamkhalela ngokubhubha komntanakhe, uMichael, wamthola egula kodwa kutshengisa engani uzaphephe kukhuhlane owawumlalise phansi.
Uthi abantu bakwele Zimbabwe balahlekelwe ngumama wesizwe owayelesibindi sokuvikela umkakhe umuyi uCannan Sodindo Banana ngesikhathi sempi yenkululeko.
UBanana wayelwisana labamhlophe loba wayengumvangeli eMethodist Church.
Uthi uNkosikazi Banana wasebenza kahle ngesikhathi umkakhe ebambe isikhundla sikamongameli welizwe leZimbabwe kusukela ngomnyaka ka1980 kusiyafika umnyaka ka1987 umuyi uRobert Mugabe esethatha isikhundla sikamongameli esilamandla amanengi.
UNkosikazi Banana wasekela umkakhe ngesikhathi engumlamlankunzi phakathi kwebandla lePF Zapu lele Zanu PF. Lesi kwakuyisikhathi sombhuqazwe weGukurahundi.
UNkosikazi Banana wabaleka kwele Zimbabwe wayaphephela kwele Bhilithane kulandela ukuthoniswa komkakhe, okuthiwa wadlwengula amanye amadoda ayemgcinile esigodlweni sikamongameli.
UBanana wakuphika lokhu kodwa wavalelwa entilongweni okomnyaka kulandela ukugwetshwa kwakhe yinkantolo.
UNkosikazi Banana wayengumbalisi engakabi ngumama wesizwe.