Abaculi abalodumo abasebenza emazweni osokuqhamuke umkhuhlane weCoronavirus kanye labanye abadabuka eZimbabwe bathi kabasasebenzi ngemfanelo ngesikhathi amazwe atshiyeneyo elwisana lokumemetheka komkhuhlane lo.
Sebethwele nzima abadabuka eZimbabwe abasebenza eGermany, Austria, London, Israel, Canada, eMelika lakwamanye amazwe okumemetheka igcikwane leCoronavirus.
Abaphila ngezomculo bahlaba umkhosi ngokuvinjwa kwemicimbi yabo besithi kuzaba nzima ukuziphilisa.
Nomathamsanqa 'Nkwali' Mkhwananzi. (Photo: Nkwali)
Omunye wabahlaba umkhosi nguNomathamsanqa Mkwananzi, owaziwa kakhulu ngokuthi nguNkwali, osebenzela emazweni abalisa eleGermany, Italy, Austria lamanye.
UVusa Mkhaya, ohlala kwele Austria, ngomunye okhala ngokuvinjwa kwemicimbi yamaqembu emazweni.
UMkhaya uthi kukhanya bavimba ngamandla endaweni zonke zelizwe njengoba kusasa kuzavalwa izikolo, indawo zokudlela, amavinkili lezinye eVienna.
UOluhle Ncube ucula iHouse Music ekwele Bhilithane lapho asehlala khona. (Courtesy photo: Oluhle Ncube)
Omunye okhala kakhulu nguOluhle Ncube, odabuka eZimbabwe ocula iHouse Music, osehlala kwele Bhilithane. Uthi balahlekelwa yimali ngenxa yomkhuhlane lo.
Umqondisi weqembu leInkulukelo Yabatsha School of Arts, uNkululeko Innocent Dube, uthi akusasebenzeki kuzwekazi leEurope okumemetheka igcikwane leCoronavirus.
Uthi loba kungasuswa imigomo yokuvimba ukumemetheka kwegcikwane leCoronavirus, abantu bazathatha isikhathi eside ukuze babukele amaqembu aculayo.
UNkosazana Vivian Nomalanga Bhebhe
Kulabanye njalo abadabuka eZimbabwe abethuswa ngumkhuhlane lo.
UNkosazana Vivian Nomalanga Bhebhe, ohlala kwele Israel, uthi kukhangelelwe ukuthi kuzavalwa imingcele kulelolizwe ngoMvulo.
UMaBhebhe uthi izikolo zikhangelelwe ukuthi zizavalwa ngoMvulo.
Abantu bathi akulula okubhekane lozulu ongazi ukuthi umkhuhlane lo uzaqhamuka ngaphi njalo uzaphela sokutheni.
Kulabantu abedlula inkulungwane ezine asebebulewe ngumkhuhlane lo owaqhamuka kwele China nyakenye. Akulamantu osebenjwe ngumkhuhlane lo kwele Zimbabwe.
Your browser doesn’t support HTML5
Abaculi Abalodumo Bathi Sebelahlekelwe Ngumsebenzi Ngenxa yeCoronavirus