UMnu. Jacob Ngarivhume, oqoqa ukutshengisela okuzakwenziwa emigwaqweni ngeviki ezayo, lentathelizindaba uMnu. Hopewell Chin’ono, basemthethwandaba okwamanje lapho abetheswa amacala okuphehla umvukela eZimbabwe.
Amagqwetha ababili laba abagoqela uNkosikazi Beatrice Mtetwa, uMnu. Gift Mtisi loMnu. Dough Coltart, bathi uNgarivhume loChin’ono bathunjwa ngabacatshangelwa ukuthi ngamapholisa ensitha ezindlini zabo eHarare ngenxa yokuthi akuvezwanga ukuthi babebotshelwani njalo babotshwa ngobani.
Amapholisa athi ababili laba baloba okutshiyeneyo ebulenjini bokuxhumana obeTwitter lokunye bekhuthaza abantu ukuthi batshengisele emigwaqweni ngeviki ezayo besola ukumemetheka kokungethembeki phakathi kweziphathamandla zikahulumende, ukugugudeka komnotho okuqhubekela phambili lokunye.
Kuthiwa abakwethulayo kwephula iziqa zomthetho obizwa ngokuthi yiCriminal Law (Codification and Reform) Act.
Ababili laba sebelensuku ezimbili bevalelwe enkambeni yamapholisa bemelele ukuthoniswa amacala abawetheswayo.