Amalunga edale leSenate eMelika athi kumele uhulumende weZimbabwe engakhahlamezi abantu abatshengisele emigwaqweni besola isimo esibi somnotho.
USenator Chris Coons loSenator Cory Booker, abangamalunga ebandla lama Democrats, bathi kubi kakhulu okwenziwa nguhulumende kaMongameli Emmerson Mnangagwa osethume amasotsha lamapholisa ukuthi athwalise nzima labo abatshengisela emigwaqweni labasezindlini zabo abangenzanga lutho.
Embikweni abawethule ngoLwesibili, uSenator Coons loSenator Booker baphinde bathi uhulumende weZimbabwe kumele avule ubulembu beInternet lobulembu bokuxhumana obuvalwe ngoMvulo ebusuku.
Inhlanganiso yeZimbabwe Congress of Trade Unions lezinye ezizimele zodwa zicele uzulu ukuthi atshengisele emigwaqweni ngokuthula.
UNkosikazi Monica Mutsvangwa, umphathintambo kahulumende obona ngezemibiko, uthe ukutshengisela lokhu bekutshotshozelwa ngamabandla aphilisayo.
Kodwa-ke amabandla aphikisayo athi uhulumende ukhuluma angakwaziyo ngenxa yokuthi usephelelwe ngumphako.
Kusenjalo, uhulumende weMelika ukhuthaza izizalwane zakulelo lizwe ukuthi zingahambihambi emadolobheni anjenge Harare, Chitungwiza, Bulawayo lamanye lapho okulabantu abanengi abatshengisele emigwaqweni