Bayakhala abantu ngokwenziwa libandla leMDC-T elikhokhelwa nguNkosazana Thokozani Khupe elixotshisa kumakhansili atshiyeneyo amakhansila adlelana lebandla leMDC Alliance. Kodwa kulabanye njalo abasekela okwenziwa libandla lika MaKhupe abathi amanye amakhansila emadolobheni agoqela koBulawayo abengasebenzi kahle lezakhamizi.
Abakhala kakhulu ngababhekane lokusilela kwamanzi kanye lomkhuhlane wesihudo osubulele abanye koBulawayo elokitshini leLuveve.
Ukuze sizwe okunengi ngodaba lolu,sixoxe loMnu. Thembelani Dube, okunhlanganiso yeBulawayo Progressive Residents’ Association, uMnu. Tinashe Kambarami omunye wabasanda kuxotshwe kukhansili, uMnu. Khaliphani Pugeni okubandla leMDC-T loMnu. Mlungisi Dube olwela ilungelo likazulu.
UThembelani Dube uthi amakhansila amanye kawathembeki njalo kawakwazi ukuphila labantu ngakho-ke kumele uhulumende abumbe umthetho ozavumela ukuthi kwenziwe ukhetho lwamakhansila lodwa kulokuthi lwenziwe ngesikhathi kusenzisa olukamongameli lokunye.
UKambarami uthi banengi abantu ababona okwenzakalayo kumakhansili ngakho-ke sebebasekela okwamanje ngoba bathi kubi kakhulu okwenziwa libandla leMDC-T.
UPugeni uthi ibandla lixotsha amanye amakhansila ngenxa yokuthi abalandeli okufunwa ngabakhokheli bebandla leMDC-T.
Uthi kuzaba lokugedla kwamazinyo ngoba sebehlolisisa okwakusenziwa ngamanye amakhansila ayezinika umhlaba emadolobheni akumanyano weMDC Alliance.
Your browser doesn’t support HTML5
Badlana Ingqondo Ngokuxotshwa Kwamakhansila