Abantu abanengi eZimbabwe bathi kumele inkokheli yomdabu yehlukane lezombusazwe ukwenzela ukuthi abantu bavote bengabanjwa ngamandla, ikakhulu emaphandleni.
Lokhu kuvezwe yinhlanganiso yeAfrobarometer esanda kwenza uphenyo eZimbabwe.
Impumela yophenyo lolu iveza ukuba abantu abedlula okuyisilinganiso sokungamatshumi ayisikhombisa ekhulwini – 72 percent, bafuna abalisa, osubhuku lezinduna bengangeni kwezombangazwe ukwezela ukuba bavote kahle.
Uphenyo lolu luveza njalo ukuba abantu abanengi kakhulu emaphandleni lapho okuthiwa induna zincedisana lebandla leZanu PF, kabafuni ukuba abezomdabu bekhangelane lezombusazwe. Abanye babo ngabakubandla leZanu PF.
Isisekelo sombuso welizwe sikubeka sobala ukuba induna, leyinye inkokheli yomdabu, akumelanga bengene kwezombusazwe.
UMnu. Dumisani Nkomo, ingcwethi kwezombusazwe, uthi uyakusekela okwethulwe yiAfrobarometer ngoba inkokheli yomdabu akumelanga ingene kwezombangwazwe.
UMnu. Joseph Tshuma, okubandla leZanu PF, uthi abantu balakho ukuvotela abakufisayo loba inkokheli yomdabu ingabatshela ukuba bavotele liphi ibandla.