Ngesikhathi uNcwabakazi, eqakathikiswa njengenyanga yabesifazane kweleSouth Africa, esesiya emaphethelweni, abesifazana beZimbabwe abahlala kulelozwe sebekhuthazwe ukuthi basukume, bamanyane ekulungiseleleni ikusasa yelabo ilizwe.
Linkuthazo yethulwe ngabesifazana abangene umhlangano wePan African Women’s Organisation eJohannesburg.
Amakhulu abesifazane abavela emazweni atshiyeneyo eAfrica bebethe gwaqa eJohannesburg bethakazelela ukuba ngamaAfrica kanti njalo besabelana amacebo okunqoba inhlupheko ezitshiyeneyo ababhekane lazo emazweni abo.
AbeZimbabwe abakade bekulo umbuthano bakhala ngobunzima obubangelwa yikungamanga komumo wezomnotho osekudale uhlupho lwemisebenzi lendlala enkulu elizweni.
Isizalwane seZimbabwe unkosikazi Moreblessing Tembo, uthi isimo sesisibi okokuthi kakula ngitsho leyodwa into ehamba kuhle elizweni.
Unkosikazi Tembo uthi sekuyisikhathi sokuthi abesifazane bangene ezikhundleni zobukhokheli balungise izinto.
Unkosazana Sihle Ncube yena uthi, sekudingeka amanyathelo esiphangiphangi okusiza amantombazana eZimbabwe ikakhulu labo abaphuma emulini ezihluphekayo.
UMancube uthi okunye osekubazwisa ubuhlungu yikugunyulwa kwabantu imisebenzi mahlayana osekufike kubanga lokuthi omama basukume balungise isimo kumbe bafe bethule.
Unkosikazi Tembo ukhuthaza lalabo omama beZimbabwe abasemazweni ukuthi bakele ukunaba thwitshi emazweni abanikazi ngoba isimo esesikhona sesidinga ukuthi omama bonke bazilungisele isimo selizwe bona mathupha.
Unkosikazi Thembon uthi abesifazana sekudingeka bazibuze ukuthi kusabasiza yini ukuthi nxa kulowesifazana oncintisa ukuthola isikhundla esithile bona kutholakale sebevotela owesilisa oncintisana laye.