Kulabantwana abafika amatshumi amathathu abaphathi bezikolo ababili kanye lombalisi oyedwa okungaziwa ukuthi bayangaphi kulandela ukuna kwezulu lesiphepho uClyclone Idai esabelweni seManicaland.
Lokhu kwethulwe luhlangothi lukahulumende weZimbabwe olubona ngokwethulwa kwemibiko ngesikhathi uMongameli Emmerson Mnangagwa esehlele ilanga langoMgqibelo lelangeSonto ukuthi abe zinsuku zokukhalela abantu abalahlekelwe yizihlobo labangane kulandela ukuna kwezulu leli.
Abantwana, abaphathi bezikolo lombalisi abangabonakeliyo kade besezikolo ezibalisa eseNgangu, eDzingire kanye leChimanimani.
Asenelisanga ukukhuluma lamapholisa ngodaba lolu.
Lokhu bethithibele abantu ababhekane lezulu lesiphepho elibulele abantu abalikhulu phose lamatshumi amane (139) njalo labhidliza izakhiwo ezinengi ezigoqela izikolo, izindlu, amabholoho lokunye.
Omunye wabasile engozini le uNkosazana Roselyn Mnkandla, osebenza kunhlanganiso yeNational Employment Council ebona ngezokulima, uthi lokhu eyethuswe ngumoya njalo lamanzi okwabulala abantu abanengi.
Kubikwa ukuthi abantu abasinde kulingozi basesimeni esibi njalo bakhala ngokuthi kabatholi uncedo abaludingayo, olugoqela ukudla lezigqoko.
UNkosazana Sally Mlambo, okunhlanganiso yePlatform for Youth Development, uthi kulenhlanganiso ezinengi eziphathisa abadinga uncedo lobanje kufuneka olunye uncedo.