Abafundisi abayisitshiyagalo lunye lamuhla bayethekelele izizalwane zeZimbabwe esibhedlela seAvenues Clinic leChikurubi Maximum Prison.
Omunye wabo, uMfundisi Clement Zenda, uthe babone ababhaxabulwa okumangalisayo ngamapholisa ngeviki ephelileyo ababetshengisela ezitaladini bengaphansi kwenhlanganiso yeNational Electoral Reform Agenda (NERA) efuna ukuthi kuguqulwe indlela okwenziwa ngayo ukhetho eZimbabwe.
UZenda uthe abantu laba abangabalandeli bamabandla ezombusazwe atshiyeneyo balamangxeba ayesabekayo.
Uthe baphinde baya entilongweni yeChikurubi lapho abayalelwe khona ukuthi babone ababotshelwa ezombangazwe ngaphandle kukaNkosazana Linda Masarira obonwe kuphela nguMfundisi Ancellimo Magaya owebandla lenkonzo leZimbabwe Divine Destiny.
UZenda uthe, “Into ezihlukuluze kakhulu yikuthi abantu balimele, babuhlungu … bafakwe amadrip abanye bayehluleka lokuthi bacambalale kakahle embhedeni ngenxa yokutshaywa besentilongweni betshayelwa amalungelo abo okumele batshengisele amalungelo abo awe constitution (isisekelo sombuso welizwe). Kubebuhlungu kakhulu kithi lokho.
Ugxizelele esithi, “Uhulumende simkhuthaza ukuthi ayekele ubudlwangu lobu abenza ebantwini bakhe. Asikhangelelanga ukuthi uhulumende alwe labantu bakhe.Sikhangelele ukuthi uhulumende abe ngubaba njengoba ibandla lenkonzo lingubaba.”
Uthe kabasoze basekele uhulumende otshaya abantu abakhe abatshengisela okusemthethweni.
UZenda uthe konke lokhu okwenziwa nguhulumende kaMongameli Robert Mugabe kwakusenzwa libandla leRhodesia Front elikamuyi uMnu. Ian Douglas Smith owayengafuni umbuso wabantu abansundu.
Kulezizalwane zeZimbabwe ezigoqela abamele idale lephalamende bekubandla leMDC-T abatshaywa kabuhlungu ngamapholisa baze batshengisele ngeviki ephelileyo besithi kumele kulungiswe indlela okuqhutshwa ngayo ukhetho elizweni kungakafiki ukhetho ngomnyaka ka2018.
Your browser doesn’t support HTML5
Ingxoxo Esiyenze LoMnu. Clement Zenda