Umkhankaso wokuvikela udlakela ezindlini, owe16 Days of Activism Against GenderBased Violence usuqalile njalo inhlanganiso ezitshiyeneyo zihlangene labomama bebalimukisa ngokulwisana laloludlakela.
Isihloko somkhankaso lo sithi ‘Orange the World: Generation Equality Stands Against Rape!’
Umkhankaso lo oqale ngoMvulo uzaqhubeka kuze kuyefika mhlaka 10 Mpalakazi.
Umkhankaso lo obuselokitshini leCowdray Park ubuqoqwe zinhlanganiso ezigoqela eyeWomen’s Institute for Leadership Development (WILD), Victory Siyanqoba, Bulawayo Progressive Residents Association kanye leBulawayo City Council bexoxisana lezakhamuzi mayelana lokulwisana lokudlwengulwa lodlakela abahlangana lalo.
UNkosikazi Duduzile Mathema, obekhuluma emele inhlanganiso yeWILD, uthi babone kulendingeko yokuthi baxoxisane labomama ngendaba yokudlwengulwa.
UNkosikazi Esther Zitha, okunhlanganiso yeVictory Siyanqoba, uthi inengi labomama abawazi amalungelo abo yikho behlukuluzwa emakhaya.
Kuhlolisiswa ukukhahlanyezwa kwabesifazana eZimbabwe.
UNkosikazi Nozipho Ndlovu, oyisakhamuzi seCowdray Park, uthi zinengi izizatho zokuthi omama badlwengulwe ngabantu abatshiyeneyo.
“Izizatho zinengi ezenza ukuthi omama badlwengulwe ngobaba kungaba yibelief ukuthi maybe ungahamba enyangeni ikutshele ukuthi bamba umama onje izinto zakho zizaphumelela.
“Okunye kubangelwa yindlala lokuswela umsebenzi okwenza umuntu atshone ebhodabhoda eze ecina engena khonapha ekudlwenguleni. Okunye ngekhaya abathathaneyo labo bayandlwengulana umama encitsha ubaba imfanelo zakhe ecine embamba ngeforce besekusiba yikudlwengula okungekho emthethweni.
UNkosikazi Sikhangezile Moyo, omunye oyisakhamuzi, uthi umthetho kumele uqiniswe ukuze abadlwengula omama bajeziswe.
Inhlanganiso ezehlukeneyo zizakhankasa okwamaviki amabili zilimukisa ikakhulu abesifazane ngodaba lokudlwengulwa.