Imuli lezihlobo zabotsheketsha osekulezinyanga besemgodini wegolide eStilfontein kweleSouth Africa namuhla baphoselane aqatha labaphathintambo ababili bakahulumende abebezobona ukuhlengwa kwabotsheketsha laba. Izimuli zethesa uhulumende umlandu wokwekela ukuhlenga kuseselesikhathi otsheketsha abacatshengelwa ukuba balikhulu abafele emgodini lo okwenjiwa igolide.
Lo yiwo umsindo lengxabangxoza evuke ngesikhathi umphathintambo wogatsha lwezemigodi uMnumnzana Gwede Mantashe kanye lowogatsha lwezamapholisa uMnumnzana Senzo Mchunu bezama ukukhulumisana lezimuli ebezilinde ukuhlengwa kwezihlobo labangane.
Okwenzakale eStilfontein, North West, South Africa
Ngemva kwemifanekiso eyethulwe izolo ebitshengisa izidumbu ezifika ikhulu zabotsheketsha asebefele kulo umgodi, imuli lezi zithi uhulumende nguye obangele imfa yabantu laba ngokwehluleka ukubahlenga kusaselesikhathi.
UNkosazana Zinzi Tom olomfowabo olokhu ephansi emgodini uthi kubazwisa ubuhlungu ukuthi uhulumende wekele abanye balaba otsheketsha baze bafa esala ukubahlenga kanti futhi bebencitshwa lokudla.
“If yayisivili bengahambisi izwi lokuthi they are criminals bakhumbule ukuthi ekugqibeni before I am a criminal ngingumuntu, ngesingekho apha. Even these 1000s that have been spent I dont bezizofika kuleli zinga. Ngebebebakhuphile then bebabambe.”
badla amalahle eStilfontein
Okhokhela lezi imuli kumaqhinga okuhlengwa kwabotsheketsha laba uMnumnzana Johannes Qankase uthe abalaso isikhathi sokukhulumisana labaphathintambo laba.
“Kodwa sithi kubo mbuso lento ebeliyithetha lithi lizaba smoker out liyenzile. Ubuninzi babantwana babantu baswelkile emgodini, ukuthi abathunywanga ayibalulekile kodwa impilo iyahlangulwa nxa ungumkhokheli ingakhathalekile ukuthi basuka kuwaphi amazwe, ekugqibeleni ngabantu begazi nenyama.”
Bazongde bagan'unwabu eStilfontein
Kodwa uMantashe walile ukuthi imfa yabanye babotsheketsha laba ibangelwe nguhulumende.
“Ungangena emgodini usiyatshontsha igolidi ngeke uthi kulomuntu olomlandu nxa usufike wafela khona. Umlandu ngowakho lalo okuthumileyo.”
Kusenjalo, uhlelo lokuhlengwa kwabotsheketsha luqhubekela phambili. Selokhu luqalile izolo kusiyatshaya ihola lesihlanu ntambama namuhla besekuhlengwe abaphilayo abaphose befike ikhulu – 91 kwakhutshwa lezidumbu ezedlula amatshumi amane - 43. Inhlelo zokuhlengwa bezilokhu ziqhubeka ngesikhathi sisiya emoyeni.
Uhulumende uthi inengi labaphuma emgodini laba yizizalwane zeZimbabwe leMozambique. Abahlengi bathi kuzathatha insuku ezilitshumi ukuthi baphethe loluhlelo, qede lapho besekuqala uhlelo lokudinga izihlobo zalabo abakhitshwe befile.
SEE ALSO:
Udaba Esilwethulelwe NguThuso Khumalo