Inhlanganiso yezisebenzi eye Zimbabwe Congress of Trade Unions ithi abaphathintambo bogatsha lwezaphakathi kwelizwe, uMnumzana Kembo Mohadi loMnumzana Giles Mutseyekwa kumele batshiye umsebenzi ngoba bengawenzi kuhle.
Lokhu kulandela ukubotshwa lokukhululwa ngumthethwandaba kukamongameli walinhlanganiso, uMnumzana Lovemore Matombo lezinye iziphathamandla ze ZCTU ezithi UMnumzana Percy Mcijo, Michael Kandukutu, Nawu Ndlovu loDumisane Ncube ngeSonto eVictoria Falls ngemva kokwenza umhlangano lezisebenzi.
Iziphathamandla lezi bezisetheswa icala lokwenza umhlangano zingacelanga imvumo yamapholisa. Akade bebotshiwe laba bakhululwe izolo ngoba umantshi uMnumzana Richard Ramaboea ebathole bengela cala.
Omunye wabaphathintambo bezaphakathi kwelizwe okuthiwa yi ZCTU katshiye isikhundla uMnumzana Giles Mutseyekwa ngowecele leMDC elikhokhelwa nguMnumzana Morgan Tsvangirai. UMohadi ngowe Zanu PF.
UMnumzana Japhet Moyo ngumsekeli kanobhala jikelele we ZCTU. UMoyo utshele uBrenda Moyo weStudio 7 ukuthi sebese isikhalazo sokuhlukuluzwa kwamalunga eZCTU kumphathintambo obona ngezisebenzi, uNkosazana Paurina Gwanyanya.