Abakubandla leZapu lamanye amabandla bathi kabalandaba lokuthi uMongameli Emmerson Mnangagwa uzakhetha bani ukuba angene esikhundleni somsekeli kamongameli esitshiywe nguMnu. Kembo Mohadi, okuthiwa wayesiya amacansini labesifazane abanengi abagoqela abengileyo.
Umgcinisihlalo webandla leZapu, uMnu. Isaac Mabuka, uthi kabazihluphi ngokuzakwenziwa nguMnangagwa njengoba basuka kudala kubandla elibusayo.
UMabuka uthi akulamuntu okubandla leZanu PF okumele azibize ukuba ngowebandla leZapu ngakhoke abafisa ukungena esikhundleni sika Mohadi kumele bakhankase ngezinye indlela.
Lokhu kusekelwa nguMnu. Mqondisi Moyo, okhokhela ibandla leMthwakazi Republic Party, othi ukuwa kuka Mohadi kuveza ukuncindizelwa kwabadabuka eMatabeleland.
UMoyo uthi okwenziwe nguMohadi akwedluli ukuchitheka kwegazi okwenzakala ngesikhathi sombhuqazwe weGukurahundi.
UMoyo uthi uMnangagwa uzazikhethela umuntu amfunayo.
Kodwa uMnu. Joseph Tshuma, uthi ozakhethwa ngumuntu okubandla leZapu elalikhokhelwa ngumuyi uJoshua Mqabuko Nkomo.
Kubikwa ukuba kulabantu abanengi abafisa ukungena esikhundleni esitshiywe nguMohadi. Bagoqela uMnu. Obert Mpofu, uNkosikazi Sithembiso Nyoni, uNkosazana Oppah Muchinguri Kashiri, uGeneral Phillip Valerio Sibanda, uMnu. Simon Khaya Moyo, uMnu. Tshinga Dube labanye. Kasenelisanga ukukhuluma labo ngodaba lolu ngenxa yokuthi kade bengaphenduli omakhalekhukhwini babo.
Your browser doesn’t support HTML5
Ibandla leZapu leleZanu PF Athobelene Ngesikhathi Kudingwa Ozangena Esikhundleni Esitshiywe NguMohadi.