Amalunga ebandla leZapu athi atshiywa phandle kwenkulumo zokukhumisana umlotha ezenziwa yikhomishini yeNational Peace and Reconciliation Commission ekhokhelwa ngowayengumahluli womthethwandaba uJustice Sello Nare.
Amalunga eZapu athi abalandeli bebandla leli yibo okumele akhokhele inkulumo zokukhumisana umlotha ngoba yiwo abathwaliswa nzima yiGukurahundi ele Zimbabwe lisanda kuthola uzibuse.
Ibandla leli lithi kukhanya engani lapho obekulekhomithi le bekugcwele amalunga ebandla leZanu PF lawe Movement for Democratic Change (MDC).
UMnu. Johnson Mkandla, okhangelane lendaba zeGukurahundi kubandla leZapu, uthi umbhuqazwe lo wawuphakathi kwebandla leZAPU lele ZANU PF ngakho-ke nxa lelibandla selitshiywa kundaba zokukhumisana umlotha ngeke kube lokuthula.
“Nxa kuyikuthi indaba yeGukurahundi ingaphela ilungiswe sibili ngendlela eqondileyo, iZAPU kumele ibe phakathi kule iNational Commission. Nxa ingekho iZAPU eyiyo eyadala khonokhu, ngoba impi yeGukurahundi yayiphakathi kweZAPU leZANU, uMugabe le ZANU befuna kubelebandla elilodwa, bazama ukubhidliza iZAPU ukuze ingabi khona. So nxa selisitshiya sekukhunyelwana imilotha ,kukhulunywa labantu abaseceleni, akusoze kuzwakale njalo angikholwa kungaphela lokhu.
Lokhu kuvele emhlanganweni wabekhomishini le owenzelwe koBulawayo obukhelwa nguNare.
UNare, ongumcinisihlalo weNPRC, kazange aphendule okufiswa libandla leZapu,
Ekhuluma ngokukhumisana umlotha emhlanganweni lo, uNare uthe bakubona kufanele ukuthi baphange bangene kundaba yeGukurahundi ukuze abantu baphole amanxeba.
“Indaba yeGukurahundi ibilokhu kungakakhulunywa ngayo okwesikhathi eside. Umongameli ekubuyeni kwakhe ezohlangana leMatabeleland Collective wathi bakhulume mgceke ngendaba yeGukurahundi ngakho lathi besiyiphethe. Sakubona kufanele ukuthi siphange singene kuyo indaba yeGukurahundi ukuze abantu baphole amanxeba ,basitshele okwenzakalayo, kodwa lokhu akutsho ukuthi sesithethe ezinye indaba sazifaka eceleni. Sibone kufanele ukuthi indaba le yeGukurahundi kube yindaba esiyaqalisa ngayo kulesi isigaba seMatabeleland le Midlands.”
UNkosikazi Jenny Williams, omele iMatabeland Collective, uthe kuyadingeka ukuba mhlawumbe kube lekhomithi ekhangelane leGukurahundi kuphela ukuze kukhanye ukuba uhulumende senanza abantu beMatabeleland.
UMnu. Levi Moyo, ongumfundi njalo esebenza ndawonye leZimbabwe Christian Alliance, uthe ulokuthandabuza ukuba kuzaba lokuthula kundaba yeGukurahundi.
Abekhomishini eye National Peace and Reconciliation Commission isibeke kwaba sobala kuzulu weMatabeleland ukuba bahlose ukuqala ngendaba yeGukurahundi ekuzameni ukuletha ukuthula lokukhumisana umlotha, kodwa babuye bathi lokhu akutsho ukuthi sebebeka ezinye indaba eceleni.
IGukurahundi yabulala abantu abafika inkulungwane ezingamatshumi amabili eMatabeleland leNkabazwe ababelandela ibandla leZapu elalikhokhelwa ngalesos’ikathi nguJoshua Mqabuko Nkomo.
Your browser doesn’t support HTML5
Udaba Esilethulelwe NguBathabile Masuku