Isigaba seZanu PF eManicaland sesinqume ukuthi ummeli weHeadlands njalo owake waba ngunobhala wokuqoqwa kwenhlelo zalelibandla uMnu Didymus Mutasa kumele axotshwe ebandleni.
Lokhu kulandela imbiko ethulwe nguMutasa esola uMongameli Mugabe esithi unguntandokayiphikiswa. Uphinde wasola uNkosikazi Grace Mugabe esithi ubangele ukungezwaku kubandla ngokuphehla inzondano.
UMutasa uthe njalo yena labanye abasuswe ezikhundleni zabo besetheswa icala lokuzama ukugenqula uMugabe embusweni, bazacela umthethwandaba ukuthi wesule impumela yomhlangano weCongress oqhutshwe ngoMpalakazi.
Emhlanganweni eziwenzele eMutare ngoLwesine, iziphathamandla zeZanu PF eManicaland zithe uMnu Mutasa uveze ukweyisa ibandla lenkokheli yalo.
Ngalokho, bathi kumele axotshwe kokuphela njengoMnu Rugare Gumbo, yena owayeyisikhulumeli seZanu PF kanye lowayengumkhokheli wabalwa impi yenkululeko Mnu Jabulani Sibanda.
Abaphume lomqondo wokuxotshwa kukaMutasa nguMnu Patrick Chinamasa loNkosikazi Opah Mchinguri. Lokhu kuveza sobala ukulwisana okuqhubekayo kubandla leZanu PF.
Ukuhlaziya loludaba sixhume ingcwtehi kwezombusazwe uMnu Dumisani Nkomo yena othe iziphathamandla ezixotxhwe kuZanu PF zingasebenzelana leMDC zilakho ukuphuma lebandla eliqinileyo.
Your browser doesn’t support HTML5
Ingxoxo loMnu Dumisani Nkomo