Ngesikhathi amazwe womhlaba elungiselela ukunanza usuku oluqakathekisa imisebenzi yemisakazo, lwe World Radio Day ngoMgqibelo, abenhlanganiso yeZimbabwe Association of Community Radio Stations bathi basalindele ngamehlo abomvu ukuqhitshwa komsebenzi wokunikezwa kwamalayisensi kumisakazo yezabelo eyisikhombisa eseleyo njengokutsho kwabe Broadcasting Authority of Zimbabwe - BAZ.
Abe ZACRAS baveze lokhu ngemva komhlangano wenhlanganiso zemisakazo yezigaba ngasemhlubulweni oweEast and Southern Africa Regional Indaba.
Obona ngokuqhutshwa komsebenzi kuZACRAS umnumzana Jerry Zingwevhu ulandisa kabanzi ngenkuthazo yabo.
“Isisekelo sombuso esitsha yebo siyakuqoqa kahle, siyakuhlela kahle ukuthi kumele kube lenhlangothi ezintathu zokusakaza, ezeRadio, iPublic Broadcasting, iCommercial Broadcasting le Community. Kunganikwa amaCommunity Radio angasi maCommunity Radio, kakunikwe amaCommunity Radio aqotho.”
Okusekelwe yisiphathamandla senhlanganiso ye Community Youth Development Trust - CYDT eGwanda, uNkosazana Bongiwe Dube.
“Ukuthi ama issues abe fully addressed, kuyadingakala amaCommunity Radio Stations azasakaza kakhulu ngalezinkinga eziphathelane labantu, eziphathelane lamaYoung Women, eziphathalane leYouth kumaCommunities so that ethole ukuba fully addressed njalo lama relevant authorities abe lolwazi of what is really the state of affairs kuma Communities.”
Unkosazana Sipho Ncube womsakazo waseNtepe laye ufakaza ngokuqakatheka kwemisakazo yezigaba.
“Ukuthola kwethu icoverage, ngibona kuzasiphathisa kakhulukazi endleleni yokuthi lathi sesizaba lethuba lokunikezwa i air time, sibone lathi ukuthi amaprojects ethu lawo aseyazakala njalo lesigaba sethu siyathuthuka ”
Konke lokhu kuphume ngemva komhlangano obulawulwa ngeleZimbabwe oqhutshwe enkundleni yokuxhumana eyebulenjini eyeZOOM, uqoqwe ngabenhlanganiso yomanyano wamazwe womhlaba, eye United Nations Educational, Scientific and Cultural Organisation – UNESCO, wokwandulela ukunanzwa kosuku lokuqakathekiswa kwemisebenzi yamisakazo yamawayilesi emhlabeni jikelele, olwe World Radio Day.
Lonyaka lolusuku lunanzwa ngaphansi kwenikimba ethi “ NEW WORLD, NEW RADIO ” njalo uhulumende ethembisa ukufeza izithembiso zakhe zokuthukulula amagagazi ukuze yande imisakazo elizweni okugoqela eyezabelo yamaCommunity Radio Stations.