KuWoza Friday silomhlabeleli wezokholo uSibanjana Junior, yena oseyethule idlalade lakhe lesitshiyagalombili ehamba leqembu lakhe leImpi Yosindiso.
Linsizwa ivela ekudeni ngomculo weGospel. Ithi selokhu iqale ukuhlabela ngo1985, ayikaze ibheke emuva njalo incindezele idlalade layo lakuqala ngo2003.
Kusukela lapho iqhubeka iwakhithiza nje amadlalade okudumisa. Ezinye ingoma ezitshisayo kudlalade elitsha leli zigoqela ethi Ngivelele Nkosi.
Kulenye njalo ethi Wenhliziyo Yami, okuyingoma eyaziwa ngabanengi ngoba itholakala kusihlabelelo. Kodwa USibanjana uyithethe wayixubanisa leziginci, impumela kwaba luluju lwangempela.
Kudlalade leli, njengakwamanye nje madlalade akhe, umhlabeleli ucula ngendimi ezitshiyeneyo ezibalisi isiNdebele, isiKalanga lesiSuthu.
Idlalade leli lethulwe eSouth Africa kumaviki amabili edluleyo njalo uJunior uthi balamukele ngenjabulo enkulu abalandeli bakhe kanye lozulu jikelele.
Ezinye injgoma ezikulelidlalade zigoqela ethi Thumela Umoya, Ngiphe Baba, Ekhaya Elihle, Bazalwane, lethi Ukholo Lwami.
Your browser doesn’t support HTML5
Udaba Lusethulwa nguNtungamili Nkomo