Kuliviki kuhlelo 'Woza Friday' intathelizindaba yeStudio Seven, uJoseph Njanji usethulela idlalade elitsha lomculi ozibiza ngegama lokuthi Khuliyo aliphumise phansi kwesihloko esithi "Amaphupho Amatsha".
UNkululeko Nkala owaziwa ngegama lomsebenzi elithiwa Khuliyo uqale ukwenza ezemidlalo eyingxenye yeqembu elithiwa Thabo Arts ngesikhathi ehlala edolobheni lePlumtree.
Ekuphendukeni kwakhe koBulawayo ufike wangena kwezokubaza izithombe esebenzisa insimbi kodwa wazithola njalo esephendukile kwezomculo ndawonye leqembu lesicathamiya ele Umdumo Wesizwe.
Ekupheleni kwenyanga kaMbimbitho uKhuliyo wethulele uzulu idlalade lakhe lakuqala esebenza ezimele yedwa elithiwa Amaphupho Amatsha lona elilengoma eziyithoba munwe munwe.
Kulelidlalade uKhuliyo usebenze labaculi abagoqela uJeys Marabini, uMjokes, uCheryl, uNomae kanye loBusani Nkomo oweqembu le Umdumo Wesizwe.
Phambilini lokukhipha idlalade lakhe leli elithiwa Amaphupho Amatsha uKhuliyo ubeseleminyaka eyithoba minwe mbili engaculi njalo uthi okumenze acule njalo yikuba atshengise indlela abaculi abasacathulayo.
Igama elithi Khuliyo umfoka Nkala ulithole ngesikhathi ehamba leqembu le Umdumo Wesizwe phetsheya kolwandle njalo laqalwa ngabelungu ababesehluleka ukubiza elakhe elokuzalwa elithi Nkululeko.
Uphume enkundleni uKhuliyo ngengoma ethiwa Bhasikoro eyaduma eminyakeni edluleyo iculwe liqembu le Umdumo Wesizwe.
Your browser doesn’t support HTML5
Woza Friday: Silomculi uNkululeko Nkala ohamba ngegama lokuthi 'Khuliyo'