Kuliviki kuhlelo Woza Friday silomhlabeleli wengoma zomdumo we Hip Hop uKhulekani Zondo yena owaziwa ngegama elithiwa KG.
UKG uqale ezomculo ngesikhathi efunda esikolo seNjube njalo eleminyaka elitshumi lantathu. Igama elithi KG limelele ukuthi Killergram njengoba esithi wenza ingoma ezilohlonzi.
Lumculi uthi isifiso sakhe yikuba ezomculo zithuthuke abahlabeleli benelise ukuziphilisa ngesiphiwo sabo.
Thina sifuna umculo ubelemali, sifisa ukuba ube ngumsebenzi olemali kungabi yi joke njengalokhu okwenzakalayo ikakhulu lapha koBulawayo. Nxa uhlabela uyabe ungathi uyadeleleka. Isiphiwo lesi sicela sihlonipheke ngoba lathi sicina sisiba lenhloni zokutshela abantu ukuba singabaculi./
Ngesikhathi eqala ezomculo umfoka Zondo ubesebenza lo Producer u DJ Face kodwa akazange enelise ukucindezela ingoma kwaze kwathi nyakenye yikho lapho athole ithuba lokwenza lokho esebenzisana lo Bobz kanye lo Slickah abe Nu Era Studio.
Loba nje eqale nyakenye ukucindezela lumculi uthi ingoma zakhe zamukelwe kuhle kakhulu nguzulu.
Abantu bayangithanda ngoba lami bengingakholwa ukuba abantu bayangithanda kodwa ngithe ngicula kumkhosi we Ibumba abantu bajikela imali estikini. Kwakuhlabela abantu abanengi abakoBulawayo kodwa mina yimi ngedwa engathi ngihlabela abantu bajikela imali estikini.
Abaculi abaziwayo uKG aseke wasebenza labo ngabagoqela uKhuxxman, uGuluva 7 kanye loMchez’nana.
Lumculi uthembise abalandeli bakhe ukuba uzabaphakulela idlalade lakhe lakuqala ngenyanga kaMabasa njalo lizabe lilengoma azenze esebenza labaculi abatshiyeneyo abagoqela labe Dollar Sign Music abatholakala esigodlweni iHarare kanye lase Kadoma.
Your browser doesn’t support HTML5
Woza Friday: Umculi womdumo weHip Hop uKG