Kuhlandla lethu le Woza Friday liviki umculi weDisco-Kwasa uGetty Dawu uxwayisa intsha yeZimbabwe ukuthi ingalahlekelwa lithemba loba isingaphansi kwesimo esinzima kangakanani. UBenedict Nhlapho uxoxa lalo umculi oseyethule idlalade elitsha elithi uZiqhenye.
Lintokazi yaseDolo eFelabusi ileminyaka elitshumi lesithupha kuphela kodwa isihle yaqala ukunakakela osowabo.
Ngemva kokusebenza nzima esethula idlalade lakhe leDisco-Kwasa elithi Ziqhenye uGetty uthi ufuna ukwazisa intsha ukuthi lapho okulesifiso khona indlela ikhona.
"Konke engikwenzayo kufanele ngizethembe ngethembe lonkulunkulu. Ngifuna ikusasa enhle kimi labanye abancane abangilandelayo ukuthi bebelekusasa elihle. Akumelanga ukuthi ukhule ungelaphupho ngekusasa lakho".
Ziyisikhombisa ingoma ezikuleli dlalade kanti ziphethe amazwi enkuthazo. Ikhonale ethi Ziqhenye ntombazana ungabi libele lendlela. UGetty uthi nxa usuthe waba lephupho, vuka usukume uzenzele, ungabi njengembila eyaswela umsila ngenxa yokulayezela.
"Ungacabangi ukuthi ungabalephupho sekufanele uhlale kodwa wena nguwe okumele ulisebenzele kakhulu lelo phupho. Akulamuntu ozakusebenzela ukuze iphupho lakho liphumelele"
Ikhonake eyothando, kube lexwayisa ngomkhuhlane wengculaza. Leke eyesihlanu ithi "Ungangithathela konke kodwa isipho sami ngeke ukusithole".
Kuleyo intsha esitshaphaze impilo yayo uGetty uthi kayilahlwa imbeleko ngokufelwa.
"Abanye bengaba labantwana bahle bahlale, belahlekelwe lithemba, becabanga ukuthi akuselanto engalunga. Yibo engifuna ukubatshengisa ukuthi silayo indlela yokulungisa amaphutha. Siyenelisa ukuthi siziqondisi besekusithi iphutha olenzileyo liphenduke libe yibuhle".
Uphume enkundleni esithi kwabatsha "Qaphelani umhlaba usuwonakele".
Your browser doesn’t support HTML5
Woza Friday: Umculi womdumo weDisco-Kwasa uGetty Dawu