KuWoza Friday liviki uBenedict Nhlapho ulilethela umdlalo weSindebele ohlekisayo osucindezelwe kuDVD olesihloko esithi "Madlela Skhobokhobo Power 1".
Lumdlalo olotshwe lokuqondiswa nguMothusi Ndlovu ulotshwe ngobuciko obukhulu kantike kusobala ukuthi inengi lizasala lifile ngensini lembambo.
Longumdlalo ongabulala umuntu ngensini olotshwe nguMothusi Ndlovu insizwa edabuka eMatulungundu eGwanda.
Laphake uchaya obala impilo ephilwa yizinjiva eGoli ezithi nxa seziqhamuka ekhaya ngekhisimusi ufunge ugomele uthi laba bavela ezulwini kanti hatshi baphuma emkhukhwini egxagxaza kube ligxaphozi endlini nxa kungavele kune izulu.
Laphake kulendoda okuthiwa nguMadlela eyavela yathwala imitshaqana yayo yaya vakatshela umzukulu wayo UMazinyane eGoli yabonakala isithelekile kungalinde muntu.
UMadlela wathola imbila zithutha uMazinyane esengene phansi okomswenya wazithola esebhekane lentombi kaMazinyane edla amalahle.
Saqala ukuba sibi isimo sekutholakala ukuthi UMadlela uthwelwe ngumalayitsha ngesikwelede osekufuze sibhadalwe nguMazinyane.
UMothusi uthi lapha kutshengiswa impilo yokuhlala emakhethenini lemikhukhwini ephilwa zinjiva.
UMothusi uthi ihlandla lesibili lalo umdlalo uselibhalile sekusele nje kuphela ukuthi licindezelwe. Uthi umsebenzi aselawo manje yikuthi umdlalo wakhele ungene kubomabona kude abafana le ZTV leminye eyakwele South Africa.
Ngaphandle kokuhlekisa uthi umdlalo wakhelo uxotsha lobuvila ebantwini abafana loMadlela. Uthike iphupho lakhe elisemqoka yikuthi ngelinye ilanga umdlalo wabo lowu udlalwe viki zonke kuze kube ntolontolo emisakazweni yabomabona kude.
Kantike uthi wena ofuna ukuzitholela lumdlalo lawe ubulawe zimbambo, khuluma laye enkundleni yebulenjini eye Facebook egameni lakhe uMothusi Bashimane Ndlovu.
Your browser doesn’t support HTML5
Woza Friday: Umdlalo wokuhlekisa owe Comedy