Kulimpelaviki kuhlelo Woza Friday iStudio Seven ilethulela ingxoxo loqondisa ukucindezelwa lokuhlelwa kwedlalade lomculo uProducer, uJoe Maseko yena oqhubekela phambili epheka indlikizane zengoma eziphuma kuStudio sakhe esibizwa ngokuthi yi House of Rising Sound esitholakala elikitshini le Gwabalanda, koBulawayo.
UJoe Maseko ngu producer oseleminyaka edlula elitshumi lesithupha waqala inkampani yokucindezela ezomculo eye House of Rising Sound
esebenzela endlini yangakibo elokitshini leGwabalanda .
Ezomculo uziqale esenkonzweni lapho akade esebenza lamaqembu acula ingoma zokholo kwathi ngomnyaka ka 2000 yikho lapho aqale khona
ukusebenza labaculi abatshiyeneyo.
UMaseko usebenze labaculi abalodumo kwele Zimbabwe abagoqela uSandra Ndebele, umuyi uBeater Mangethe, iqembu le Black Umfolosi,
uOlben Moyo, uPegia Nare, iqembu le Iyasa ikanti nguye owaqala ukusebenza leqembu lase Botswana elilodumo ele Culture Spears.
Istudio se House of Rising Sound uMaseko usiqale ngesikhathi amathuba okucindezela esanciphile kubaculi abasacathulayo njengoba
amankampani amakhulu ayebatshela ukuba batshaye njengabaculi abathile ukuze ingoma zabo zithengwe.
UMaseko lanamhlanje lokhu esebenza labaculi abatshiyeneyo abatshaya imihlobo eyomculo etshiyeneyo abagoqela abatshaya ingoma
ezohlobo lwe Jazz njengale esivule ngayo uhlelo eyeqembu le Men at Work ekhalelwa nguQeqeshiwe ethi Kumnyama.
Labasakhulayo abatshaya ezakulezinsuku labo bacindezela khona eHouse of Rising Sound.
Isimo sezomculo emhlubulweni weMandebeleni asisafani langesikhathi uMaseko eqala ezomculo kungenxa yenguquko eseyaba khona
ekusebenzeni kwemisakazo yakwele Zimbabwe yona eseyenza kwaba nzima ukuba ingoma zabo zitshaywe emoyeni ngoba imisakazo eminengi
itholakala esigodlweni iHarare.
UMaseko uthi umculo kwelemaNdebeleni uzavuka usabalale lomhlaba nxa abaculi bengahlanganisa isimanje manje lemculo yomdabu
ndawonye leyakudala eyaculwa ngabaculi abafana lomuyi uFanyana Dube, umuyi uSolomon Skuza kanye lo Lovemore Majaivana.
Kulezinsuku uMaseko usebenza loproducer osakhulayo uSimba yena owaziwa ngegama lomsebenzi elithi K.O.D onguye osebenza labaculi
bengoma ze House Music njalo othi nxa esecindezela ezakhe usebenza leqembu le Drum Cult.
Your browser doesn’t support HTML5
Ingxoxo loProducer womculo uJose Maseko