Inhlanganiso ephathisa abalambayo ngokudla emhlabeni jikelele, iWorld Food Program, ithi izaqhelisa uhlelo lwayo lokwabela abalambayo ukudla elizweni ngoba liqhubeka lisanda inani lababhekane lendlala.
Isikhulumeli salinhlanganiso uMnu David Orr utshele iStudio 7 ngoMvulo ukuthi umomo uqhubeka usiba mubi ngoba seliqonge lafika kuzigidi phose ezintathu inani labalambayo.
Ngalokho uthi inhlanganiso yakhe idinga imali yokwengezelela ukudla ekwabela abalambayo eZimbabwe.
Okwamanje iWFP ithi ilohlelo lokwabela ukudla abantu abangu 820, 000 kuphela ezigabeni zelizwe ezingamatshumi amathathu lasitshiyagalombili.
UMongameli Mugabe uhlele eleZimbabwe njengelizwe elibhekane lendlala embi kakhulu lonyaka ngeviki edluleyo.
Lokhu kwenza uhulumende lenhlanganiso ezizimeleyo zingenele ngamandla emizameni yokudinga ukudla.
Uzulu endaweni ezitshiyeneyo zelizwe uthi kumele uhulumende asungule uhlelo lokuphekela abantwana besikolo ukudla ngoba bebanengi abantwana abangasayi esikolo ngenxa yendlala.
Omunye wabalombono lo yisakhamusi seMkhologwe uMnu Moffart Ncube.
Uthi okudanisayo yikuthi esikhathini esinengi, osobhuku yibo abathola ukudla kuphela.
"Umuntu wonke kumele aphiwe ukudla. Akulamuntu omele atshiywe phandle," kutsho uNcube.
Amazwi akhe agcizelelwe yisakhamuzi sakoBulawayo uMnu Lloyd Ncube yena othi akulamuntu omele ebandlululwe ekwabiweni kokudla.
Isakhamusi seMatjnge uMnu Phumlani Ndebele uthe lanxa bebethembele kusivuno ekade beyasithola emasimini okulima ngokuthelezela, sebevalelwe amanzi yiZINWA.
Abanengi bathi uhulumende kumele abhekane lodaba lwendlala lolu ancedise uzulu njalo amdingele ukudla kwenkomo.
Bathi amalunga eZanu PF kumele etshiyane lokutshona edlephana ebanga izikhundla.
Your browser doesn’t support HTML5
Udaba Lusethulwa nguNtungamili Nkomo